Kelia menya ba sukut siti kampung di menua china din, bisi siko ini tuai diau kediri nengali rumah ke jauh ari penatai jalai sereta ai. Ketegal ke jauh ati penatai ari, dia ini tuai tu tadi ninting ari ninting bulan besauk ke ai kena bebasu kena mandi ari sungai ke umbas ia penyauh ari rumah ia.
Tiap ari, ini tuai tu nyauk ai ngena 2 igi udat ke disengkang ia enggau sebatang kayu nyadi penimbal dikena ia ngema. (Udat tu tong kayu ke dikena orang kelia nyauk sereta nyimpan ari ke diganti ke baldi kitai saritu, ke selalu disandik orang dua betimbal). Siti udat tudah sigi manah nadai bumbus, tang sigi nya tadi bisi pesok, nya alai setiap kali datai ba rumah, sigi udat tu tadi meruan penuh, sigi agi kira separuh.
Laban ngasai ke diri enda entu bejasa sereta beguna ke ini tuai ke seruran ampa mai ai pulai, dia udat ke pesok tu tadi lalu bejako madah ke diri nadai guna agi laban ke selalu beduan tudah ini tuai tu tadi alai ke ai ke dibai ia niting ari enda kala cukup.
Dia ini tuai tu tadi lalu madah “Nemu aku nuan pesok, tang aku sigi enggai muai nuan, laban aku beguna ke nuan”. Peda nuan sepemanjai jalai ke dititi aku, sepiak muak ke nuan, rumput sereta bungai ia tumbuh manah laban ke selalu disiram nuan ninting ari”.
Ari jerita pandak tu tadi menyadi, kitai mensia enda tau bejai ke pengurang diri ke diberi petara (dalam pengidup). Setiap ke lebih nya sigi bisi kurang, setiap ke kurang nya tadi bisi mega pengelebih ia.
Kitai enda tau manding ke diri enggau orang bukai laban tuah nasib kitai mensia enda sama. Orang ke ba rumah panjai ngambi ke banding, ni ulih manding diri enggau sida ke megai pengawa besai dalam perintah, tang sigi utai ke mesti ditemu kitai, kitai bisi ungkup kitai empu dalam dunya.
Nama reti Pemansang diri? Pemansang diri ukai reti ia kitai saritu nyadi kuli udah nya penudi ila lalu nyadi tokey. Pemansang diri tu reti ia ngambi ke banding, enti taun tu tadi aku beumai bulih segantang padi, taun tu aku bulih dua. Nya baru Pemansang (success).
Success (Pemansang) : Bepekit ngelaban diri.
JAKUIBAN.COM 
amai nya munyi ko cerita nuan nya. bisi sekeda orang ka mai manding ka diri enggau orang bukai. bisi manah bisi enda ga nya ba aku. ti manding diri ngau orang bukai alu ka nyadi lebih manah ari orang nya tauka nyadi ka orang nya nyadi 'role-model' nya sigi amai manah ba penemu aku. ia ti salah nya, enti manding diri ngau orang bukai alu ngasai diri jauh mai penimpang ari orang alu nda ingat ka pengelebih diri mpu. munyi ko nuan, kitai mensia tu bisi pengurang enggau pengelebih masing-masing.