Betubuh Bisi enggau Nyera

Kitai Iban endang iya idup enggau adat kenau iya ari kandung. Maya indai kitai ngandung ke kitia, iya endang iya udah idup betatika adat, niti nali sempekat ti dipeturunka ngagai peturun Iban kenyau ari kelia menya.

Nyadi terubah indu nemu diri deka betubuh bisi tauka ngandung nya lebuh iya ngasaika diri badu tauka ngetu datai kain. Ba bulan siti ti nangkanka nya, enti iya nadai ga datai kain nya baru iya amat nemu diri ngandung. Iya pan lalu belabuh ngitung bulan diri ngandung ari bulan ti keterubah iya nadai agi tauka ngetu datai kain nya tadi.

Sereta kandung iya udah lega, indu pan lalu belabuh tauka berasai nyera. Lebuh indu nyera ,iya tetengukka mayuh macham utai dempa kelebih agi baka buah masam enggau mayuh macham utai ti enda kala ka diempa iya baka ke ngelama tu. Bisi sekeda nya empegal deka ngempa utai ti enda patut, baka temu tak tetenguka pending laki diri empu, tai manuk enggau utai ti bukai.

Sera tu naka ulih meseti dipantupka. Pemesai iya bisi dikenang dalam cherita asal ti ngenang Keling ti nempuh bemacham penguji sereta nyau besabung nyawa deka ngulihka Buah Binjai ti berundai panjai tampuk ti diseraka Kumang aya iya ngandung.

Advertisement

Tanya Indu

Di kena nyadika jaku pemuka senentang leka main tanya indu tu, dulu aku ngenang ngelansa pasal kitai Iban ti merambu deka jadi melaki bebini nitihka adat enggau sempekat asal kitai bansa. Nyadi, chara tauka adat kitai Iban jadi melaki bini tu bisi 3 macham. Iya ke-terubah iyanya “Nanya Indu”, ke-2 nya “Anjung Lekaki”, lalu ke-3 nya “Nama ke Diri”.

“Nanya Indu” tu pengawa Adat, lalu “Tanya Indu” tu pengawa ti bebungaika jaku maya pengawa “Nanya Indu”. Selalu iya, enti orang besebutka pengawa ti Nanya Indu, dia dih indu deka nitihka lelaki pulai ke menua iya, pulai ke lelaki, reti iya “Nguai” ke lelaki. Terang enggau silik ke-agi senenang ripih pengawa Nanya Indu tu deka dikenang aku dalam karang ti nangkan ke tu ila. Chara ti jadi melaki bini ngena pengawa “Anjung Lelaki” mai reti lelaki “Nguai” ke indu. Lalu adat “Nguai” ti dibai ngena chara “Nama ke Diri” nya bepanggai ba sapa ti nama ke diri ngagai ruang bilik sapa. Enti lelaki nama ke diri, reti iya lelaki nya deka nguai ke indu, lalu enti indu nya nama ke diri ngagai lelaki, reti iya indu nya deka nguai.

Leka ka kitai dulu kenang ngelansa nya tadi, kitai pulai ngenang karang kitai ke sekali tu. Pengawa tauka atur Nanya Indu tu mih ti nyadi sereta mengkang dititih sereta dikena bejadika orang ti deka jadi melaki bini bepun ari kelia nyentukka seharitu. Taja pan kitai Iban di rumah panjai enggau mengeri diatu udah tebal agi jadi melaki bini ngena jalai ti moden, jalai atur adat sigi dipejalaika kitai taja iya enda chulin baka ti dulu, tang ripih pengawa nanya indu nya sigi bisi alaika apai indai lelaki deka dulu mesu ngagai apai indai indu, bebungaika jaku madahka anak bujang diri bisi merambu deka ngambi anak indu sida iya nyadika bini.

Bepanggaika jaku aya Guang Ganda, 74 taun ianya siku lemambang ari Tanjung Sikup, Melupa Saratok lebuh maya iya ditanya ba rumah sida apin lama, iya mandangka jaku “Nunda batang adat Iban kelia, enti lelaki udah mutuska diri deka nyadi enggau indu ke alai iya ngayap, bala sida lelaki sebilik baka apai enggau indai sereta kaban belayan ti bukai patut baum lalu nanya sereta ngemaya haribulan deka nanya indu nya”.

Kena ngepunka pengawa nanya indu, bala ari sepiak lelaki nganjung raban ti mit ngagai sepiak indu. Raban tu mih ti selalu nyengkaum bala sida sebilik tang enda mai apai indai indai indu nya empu, laban raban keterubah tu sigi bala aya enggau ibu lelaki nya, tau kekadang dua tiga iku aja semina dikena bebunga jaku. Reti nya tadi kena ngisik ngagai bala apai indai indu pasal bisi lelaki ke bisi perambu deka nyanay indu nya nyadi ke bini tauka madah bisi apai indai lelaki deka minta indu nya nyadi menantu sida.

Nangkanka pengawa nya, enti apai indai indu setuju nerima perambu tu, nya baru bala sepiak lelaki lalu terus enggau atur nanya indu munyi ke udah disebut dulu tadi. Raban sida sekali tu lebih mayuh agi tubuh sri raban ke ngepun ke jaku tadi. Apa iya seduai indai lelaki nya mega deka sama enggau raban tu, laban maya ke nanya indu tu mih sida lalu nguai pulai ngagai bilik lelaki, taja pan sigi udah nyengala, reti nanya indu nya sigi tuju iya minta undu nya pulai ngagai bilik lelaki taja pan ukai semua nyadi bakanya, laban bisi agi atur ke dikumbai ngambi indu udah bekau tu ila.

Kelimpah ari nya, ba runding penemu aya Gregory Mawar, iya bisi mandangka enti apai indai indu nya enda tentu nemu bejaku, iya tau ngasuh barang sapa ti landik bejaku ngarika iya. Nya kebuah lebuh Iban nurun ngagai rumah panjai indu ti deka ditanya ke iya nyadi bini, sida suah mai lemambang ti landik bejaku sereta pandai nyadaka leka nanya indu nya awak ke ngarika sida bejaku lebuh sida datai ba rumah indu nya lagi.

Tanya indu ianya mega sebengkah ari leka main ti disadaka lebuh maya orang nanya indu ke bini. Nyadi jaku Tanya indu tu jaku ti besilup reti iya, berambai sereta bebungai. Lebuh maya nanya indu, jaku ti nyemetak nadai dikena orang tang ngena jaku bekarung aja. Baka nya mega, apai enggau indai indu nya pan bisi mega nyediaka orang siku ti landik bejaku awak ke bisi nyaup sida ti nanyaka pejalai sereta nimbal jaku pengari ari sepiak orang ti lelaki. Nya alai, rindu amat kitai ninga sida iya betimbal-timbal jaku lebuh beruruska atur nguai enggau enda nguai tauka ngatur adat bebini belaki

Niti Nali Adat Jadi Melaki Bini

Kitai Iban di rumah panjai enggau di mengeri kemaya haritu tebal agi jadi melaki bini ngena jalai moden. Taja pia, agi mega sekeda ke mengkang sereta keran niti nali adat tikah asal Iban kelia, iya nya melah pinang ngena jalai asal. Nya alai beduduk ari nya, sebedau lambar tu aku bisi kala udah ngenang reti pengawa ngayap ba pengidup lama raban bansa Iban. Dia mega kitai udah nemu, ari pengawa ngayap meh ke nyadi batang jalai pengabis manah sereta ngena dalam adat asal bansa Iban ngiga tawing pengidup, iya nya kena milih orang ke patut ke bini enggau ke laki dalam pengidup aki ini kitai kelia, lebuh maya adat ngayap agi dikemeranka.

Ngena peluang tu mega aku deka nandu tauka nekan ngelansa tibar karang ti bisi ngenang pengawa Ngayap kitai Iban kelia. Pengawa ngayap tu adat ti meri peluang ngagai bala raban bujang dara beguang, bekelala sereta nanam benih pengerindu, sida iya berandau ba bilik peninduk indu berantaraka kibung, nadai pengawa ti beleman enggau pangan diri nyadi dalam sepemanjai lelaki ke ngayap indu, lalu adat ngayap tu semina mungkur leman pengidup bansa Iban aja, nya alai, nadai bansa bukai tau ngayap indu iban, lelaki Iban mega enda tau ngayap indu bansa bukai. – Tu penemu asal.
Taja pan rambau tauka rebak baru diatu udah ngelengka pengawa begayap pangan diri, kitai enda ulih muai penemu pasal ngayap sereta enggau kait iya enggau pengawa jadi melaki bini kelia. Nyadi kelimpah ari atur melaki bini asil ari pengawa lelaki ngayap indu, tauka bisi dikumbai orang tuai kelia, bini ulih diri empu, bisi mega orang jadi melaki bini ari padu tauka ari pilih apai enggau indai. Tu ukai mina nyadi dulu kelia, tang sigi agi bisi nyadi kemayatu, lalu ukai mina nyadi dalam raban bansa Iban tang mega ba raban bansa bukai mega.
Bisi mega ke nyadi ari peneka diri empu, lalu jadi manah enggau pangan diri. Seduai tu betemu ukai tegal lelaki ngayap, tang nyangka ari jalai bukai, betemu lebuh bisi pengerami. Lalu baka diatu nyangka tak betemu dalam sekula tauka alai bukai.

Endang sigi baka adat dunya pengerindu, enti sama deka ke pangan diri, seduai nadai salah jadi, asal meh nadai penanggul bukai baka salah ba adat baka anak jadi enggau pangkat aya tauka pangkat apai iya, tauka lelaki jadi enggau menyadi indai iya sereta kes jadi salah bukai mega. Kebuah enda tau, enggaika kudi menua enti nadai atur kena nabar penyalah nya.

Kena Ngemun pengawa nanya indu, bala sepiak lelaki selalu nganjung raban ti mit ngagai sepiak indu. Raban tu selalu nyengkaum bala sida sebilik tang enda mai apai indai indu nya empu, laban raban keterubah tu sigi bala aya, bala ibu lelaki nya – kekadang dua tiga iku aja – kena bebungaka jaku. Reti nya kena ngisik ngagai bala apai indai indu pasal bisi lelaki ke bisi perambu deka nanya indu nya ke bini tauka madah bisi apai indai lelaki ke deka minta indu nya ke menantu sida.
Lalu enti apai indai indu setuju nerima bantai perambu tu, nya baru bala sepiak lelaki lalu terus enggau atur nanya indu munyi ke udah disebut dulu tadi. Raban sida sekali tu lebih mayuh agi tubuh ari raban ke ngemunga jaku tadi. Apai seduai indai lelaki nya mega deka sama enggau dalam raban tu, laban maya ke nanya indu tu meh sida lalu minta indu nya lalu nguai pulai ngagai bilik lelaki, taja pan sigi udah terang nyata, reti nanya indu nya sigi tuju iya minta indu nya pulai ngagai bilik lelaki taja pan ukai semua nyadi bakanya, laban bisi siti agi atur ke dikumbai ngambi indu udah bekau tu ila.
Adat Iban kelia, nadai pengawa betunang taja pan diatu orang rebak baru bisi betunang kena nyendia diri deka jadi. Nya alai lebuh ke bebungaka jaku tadi, enti apai indai indu enda nerima, utai nya patut diteju pia aja, anang ngasuh utai nya ngemediska ati sida sepiak lelaki. Tang enti iya diterima, nitih adat asal ke bendar, pekara pasal nguai munyi ke disebut tadi patut dibantai sereta diputarka dulu.

Enti dua piak udah setuju pasal nguai, lalu setuju deka ngerami seduai jadi melaki enggau pengawa chukup besai sereta rami, pengerami nya dikumbai Melah Pinang, tauka enti mit aja, tu disebut Beterang Nikah aja, iya nya kena beterang ngagai orang mayuh seduai nya jadi melaki bini. Dua bengkah atur tu sigi diterima dalam adat asal enggau tusun tunggu bansa Iban.
Enti ngena atur melah pinang, lalu indu nya ditetapka nguai ngagai bilik laki iya, bala apai indai indai, diri sebilik, kaban belayan enggau sida lelaki nya serumah deka nurun bebala mayuh ngambi indu. Reti tu sida ngambi indu nya ari bilik penaik iya lalu ngemai iya pulai ngagai bilik lelaki. Orang ke ngambi indu deka rami ba serantu jalai, begendang tauka betabuh ngambika nadai ulih ninga bunyi burung tauka jelu, kelebih agi bunyi ke jai enda ngasuh mansang.

Lebuh ke datai ba rumah indu, sida disambut enggau chukup atur sereta pengerami. Orang ke bempu rumah lalu nimbak senapang nuju langit kena ngelai pemesai sereta pemanah basa sambut sida ngagai orang ke datai ngambi indu.

Kelia sida miring dulu sebedau niki kerumah, kekadang kena nabar utai ke jai sereta bepinta penyelap enggau pengerai ari petara. Sida minta petara merekat sida enggau pengelikun sereta pemaik enggau utai bukai ti manah. Udah tembu pengawa miring, bala raban orang ke datai lalu dibai niki sereta tama ngagai rumah panjai orang nya lalu bejalai niti ruai sereta disibur ngena ai tuak sekumbang ke niti ruai sekayu rumah panjai orang nya.

Udah ngundang sekali ngapuska rumah panjai nya, bala pengabang nya lalu d’asuh nikal baru lalu duduk ba ruai indu ke deka ditanya sida nya. Lebuh baru duduk sida sekali agi dijamu enggau ai tuak, dikumbai orangai kena masu kaki.
Sida pan lalu diberi makai. Bala ke lelaki makai di ruai, lalu indu makai di bilik. Enti orang nya mayuh, lalu bilik enda umbas endur semua pengabang indu, nadai ga salah sida makai di ruai. Nyadi orang ke duduk di ruai nya tau ngerampit duduk ba ruai orang sepiak-sepiak nitih pemayuh.

Nya alai maya ke bisi pengerami nya, semua orang serumah nya bela nganchau tikai magang, lalu bala ke bisi tau ga nyendiaka utai d’empa. Taja pia, pemakai ungkupka bala pengabang nya sigi datai ari bilik orang ke bempu pengawa. Udah badu makai, bala sida ke tuai agi, lalu berandau pasal atur adat kena bejadika seduai nya. Bisi mega pengawa dikumbai betusut dipejalaika alai orang ke nemu betusut ngiga tauka nentuka penyauh tali darah seduai ari pangan. Enti kelalu semak sida deka nentu sekalika seduai jadi mali tauka enda.

Ke tambah nya, siku indu ke tinggi pendiau dalam hiraki social bansa Iban deka dipinta mai seluk berisi buah pinang. Pinang nya deka dibelah tiga, lima tauka tujuh ngayuka berapa hari alai gandin melaki bini ba ru nya deka ngundang pinang, iya nya pulai baru ngagai rumah indu nya udah bekau jadi. Reti nya udah indu nya dibai ngagai rumah lelaki, seduai deka nikal baru ngagai rumah indu ngundang pinang selepas tiga, lima tauka tujuh hari, iya nya nitih penyampau belah buah pinang nya.

Pengawa melah pinang enda tepantup ba ati enti nadai pengawa bebiau. Pengawa bebiau tu alai siku orang ke tuai sereta bepenemu miau enggau siku manuk lelaki seduai ke baru jadi nya ke duduk atas setawak belapik enggau pua kumbu, sereta ngena ngepan asal bansa Iban. Seduai mega d’apit siku indu enggau siku lelaki bukai ke sama dara enggau bujang.

Bebiau tu ba ruai lalu kena minta berekat ari Petara ngambika seduai begulai jadi melaki bini dalam pengelantang enggau pengelikun, chelap embap, beranak betelesak lalu jadi sampai seduai ninggalka dunya injau tu ila. Bisi ga atur bebiau tu dipejalaika ba rumah lelaki aja, enti indu nya nguai kin, tang nadai salah dipejalaika ba rumah indu mega. Nya nitih peneka sida empu pengawa.
Udah tembu pengawa bebiau, nya baru buluh baling malam nya ngerah ngagai orang mayuh seduai nya diatu tau dikumbai melaki bini.

Kena nganti ke siang, bala orang malam nya lalu terus berami ngirup, betundi tauka betabuh sereta ngajat enggau mayuh main bukai.
Bisi mega orang ke bipar, enggau berisan. Reti bipar tu, lelaki ke jadi enggau indu nya deka bekala enggau bala ipar iya ari sepiak indu, lalu bakanya mega ari sepiak lelaki mesti madah ngagai indu nya sapa ke kena pangkat ipar iya. Lalu raban ari dua piak nya lalu bekelala enggau sida sepiak nyin sereta b’ambu diri nyadi ipar.

Bala sida ke kena pangkat apai indai sepiak indu enggau lelaki mega lalu ngiga isan diri empu. Tu kumbai pengawa bisan tauka ngiga isan lalu b’ambu isan.
Nyau siang hari orang ke ngambi indu nya lalu ngemai iya pulai ke rumah lelaki. Malam indu nya baru datai ba rumah lelaki, orang serumah nya pan lalu ngerami penatai iya.

Jaku Tambah: Chara kitai Iban jadi melaki bini nya bisi 3 macham, keterubah iya nanya indu, kedua nya anjung lelaki, penudi endar nya namaka diri. Utai tu deka dikenang dalam karang kitai ke dudi ila. Jenguk-jenguk mih ruai tudah pangan. 🙂

Penti Pemali

Nunda ku cherita tuai, di Pulau Borneo tu menya semina dua iko melaki bini aja, iya nya burung Pung Kampung seduai bini iya ke tau ngajih semua kayu buah bebungai lalu bebuah.

Kadir Umbat dalam bup iya Pong Kapong ( BLB, 1974 ) bisi mega ngenang pasal kebuah burung nya nemu asal meri mandi. Kebuah pia, laban bisi penanggul terubah seduai meri mandi anak seduai iya empu. Nyadi lebuh baru meri anak seduai mandi ba batang ai, lebuh baru nyungga anak, kaki anak mit nya sepiak lalu ditagup ikan juak. Kaki iya lalu putus. Ari nya tadi kaki anak burung nya mina tinggal sepiak aja. Nyau kelama, tapa kaki nya tumbuh baru ,tang meh pandak mimit.

Udah bekau penusah kaki anak seduai ke kena tagup ikan juak, Pung Kapung enggau bini iya lalu mai anak seduai lari ngagai Pulau Sumatera. Nya alai bala ke tinggal ba Pulau Borneo tussah amat ati ditinggal sida laban nadai orang tau ngajih ka kayu buah ngasuh iya bebingai lalu bebuah. Nyau kelama udah sida ke rari ngagai Pulau Sumatera, semua utai idup di Pulau Sumatera pedia amat laban kayu tak nadai bebuah. Laban nadai orang bukai kelimpah ari Pung Kampung enggau bini iya ke tau ngajih ka kayu buah berbuah, nya alai semua sida setuju ka seduai melaki bini nya diambi pulai ari Pulau Sumatera. Taja pia, sida dulu betalat sapa ke patut diasuh ngambi seduai pulai ngagai Pulau Borneo.

Ikan ai tabar lalu nyaut madah sida enda ulih meraka tasik. Ular pan nyaut madah sida nadai kaki lalu enda tersemerai ka ai tasik. Menarat enggau Bandau madah sida enda makai buah, lalu nadai kebuah sida patut diasuh ngambi.

“ Kami endang enda makai buah, lalu nadai kebuah kami begunaka Pung Kampung. Gaga meh enti kita mati, laban kami lalu makai but kita,” ku seduai. Ninga jako seduai munyi nya,bala mauh diak pedis magang ati ngagai Menarat seduai Bandau sereta lalu nyumpah seduai iya.

“ Kita menarat enda tau niki kayu, enti bansa kita bisi niki kayu, kita labuh,” pia ku jaku sumpah orang mayuh. Sumpah nya agi bisa sampai ke saritu. Bala jelu bukai nyaut madah sida enda ulih meraka tasik. Bansa burung pan nyaut ga madah sida amat tau terebai tang tasik patut diperaka nya kelalu besai lalu nadai alai sida inggap.

Udahnya baru bansa indu utai nyaut. Ku Kesulai, “ Kami duai Bebari tu meh dulu nguji ngambi pulai Pung Kampung enggau bini iya. Udah nguji nya baru nemu ulih enggau enda.” Bala ke gempuru dia sama setuju. Kesulai enggau Bebari lalu mupuk terebai. Nyau beberapa hari seduai pan datai ba tebing tasik. Nasit bisi runding, lebuh meda papung batang,seduai lalu inggap dia. Majak rarat meh papung batangnya, siang malam petang. Nyau beminggu, datai meh papung batang nya ba tebing Pulau Sumatera.

Mayuh dah alai seduai betanya, nya baru seduai betemu enggau Kusing ke madah alai Pung Kapung diau, iya nya puchuk ragai tebelian. Seduai lalu terebai ngiga ngagai endur nya lalu mujur tetemu ka Pung Kapung. Tang burung nya madah sida enggai agi pulai ngagai Pulau Borneo taja pan anak seduai ka timpang kaki nya nyau amat bujang. Taja pia Pung Kapung madah bini iya bisi ninggal tiga igi telu ba punggu kayu temesu ba tucung Bukit Kinabalu.

“ Kita tau ngasuh burung Tuk Tarau meram telu nya.” Ku bini Pung Kapung.

Ningga nya seduai lalu beguai angkat pulai. Datai ba Pulau Borneo, lalu madah berita nya. Seninjik endar telu tiga igi nya bedau manah nadai dikacau utai. Nyadi nganti Tuk Tarau ke meram telu, bansa mensia lalu diasuh matak aum sereta ngempuru semua utai enseput baru laban deka nitah raja bansa sebengkah-sebengkah.

Laban menua nya nadai jelu singa, nya alai bala jelu nitah Aji Bulan nyadi raj tang bepun ari iya ke mai beban perau lalu ujung-ujung ambi iya nyadi kerituk pending, nya alai iya lalu tebuai jadi temuai. Jelu bukai lalu manchak iya enggau kentut sida. Nya alai Aji Bulan balat bau tengung. Sida milih burung Pipi Awung jadi Raja burung lalu ngangau iya enggau nama Burung Raja. Bulu iya burik. Orang lalu milih burung Kunchit seduai Kempat Tiang jadi semata-mata semua burung. Seduai selalu mintih sebarang sapa ke ngelanggar adat, nyengkaum Menaul ke selalu minta diri makai malam.

Manuk pan bisi ga minta diri nyadi Raja, laban gamal sida sigat,sereta landik mengkukuk. Tang ku bala mayuh, “ Kita manuk enda tau nyadi Raja,laban kita enda ulih ngidupka diri empu, enti enda ditupi anak mensia. Ninga bantah nya, manuk lalu terebai ngerencah semua puchuk pala orang mayuh lalu pegari tai manchak tudah Munsang.

Orang mayuh lalu nyumpah manuk,”Enti bala anak mensia renga, pedis pala tauka jai mimpi salah hari, biau kita enggau manuk ngambika iya tabar laar.”

Nyadi Munsang tu ensepi udah dipanchak Manuk enggau tai, lalu bejaku madah sida Munsang enda tau meda manuk, laban sida lalu deka nangkap sereta diempa matak. Bala ular lalu milih Tedung jadi Raja Ular. Enda mukaii-mukai laban ke gali garing-garing semak kaki anak mensia, iku iya lalu kena indik mensia. Dia deh iya lalu mantuk tumbit nembiak nya. Meda bakanya mensia lalu nyumpah Tedung.

Ku iya, “ Sejeman dunya tu ila, kita Tedung enda tau meda anak mensia, laban enti kita bisi meda, tujuh hari udah bekau nya, kita enda tulihka pemakai.”

Nya munyi sumpah anak mensia enggau Ular Tedung, lalu nyentuk ka seharitu, semadi iya suntuk, nya baru bisi dipeda kitai. Semah dititah nyadi Raja Ikan. Udah Semah kena pilih, bala anak mensia lalu nanya penemu bala mayuh, “ Kati ku Ikan Juak ke nangkap kaki anak Pung Kapung, bisi penyalah utai bakanya?”

Semua bala ke dia bela madah pengawa Ikan Juak nya salah. Sida lalu nyumpah Ikan Juak, “ Nya alai ari diatu nyentuk ke sejeman kita nguan dunya tu, bala suku juru kita enda tau makai buah, kita mati.” Sumpah nya nyerangkung ikan Adung mega laban nya sida sekaban, mina enda sama kengkang. Sampai ka seharitu dua bansa ikan nya mmali makai buah. Ninga munyi nyak, Ikan Juak bisi gak nyaut mimit. Sida ngaku sallah sereta lalu meri jaku ajar mimit pasal jalai meri anak mandi. Ikan Juak nya madah sekeda adat enggau jalai terubah meri anak mandi ba batang ai tauka ba sungai.

Ka tanda anak mit nya lelaki, piring enda tau enda engkah ba kelingkang,lalu sayap manuk mesti ditali enggau ubung mirah sereta tanchang ba gansai lalu entak ba tisi tebing ai awakka bala ikan nemu nya anak lelaki. Ari nya, bala sida ikan lalu tau nyumpah ngambika anak mit nya udah tuai ila tau serang, tau pandang, tau kayau, tau pulau.

Kena nandaka anak mit nya anak indu, Ikan Juak nya ngajar ngasuh naka mensia ngena leletan alai Nanchang ka kelingkang enggau bulu sayap manuk. Sida lalu tau nyumpah amak mit nyangambika iya tau nakar, tau gaar, tau ngebat tau ngikat.

Anak mensia lalu diajar Ikan Juak ngasuh sida nyampi lebuh meri anak mit mandi, ngangau bala Raja Genali, Raja Lelabi, Raja Ikan, Raja Gemian, Raja Semah, Raja Tapah. Tu batang leka sampi meri anak mandi tang tau nambah enggau sampi berpinta sereta ngerintai bala tuai, bala petara aki, petara ini. Tembu besampi, nya baru muai piring siti ngagai ai, ambi ka tasih ai reti iya.

Lepas nya baru tau nabur ke beras kuning enggau letup ngicaka aji jadi tabar laar. Orang ke nyampi tadi lalu mantap ai enggau duku, ngambika ai nya enda bias.

“ Udah nya baru tau munuh manuk tauka babi ari ulu indu ke nyungga anak mit nya meri mandi. Darah nya tau nyadi ka terabai anak mit, ngasuh iya taan tubuh, panjai umur, gayu guru sereta jauh pejalai enti iya lelaki,” ku iya.

Ikan Juak pan ngajar ngasuh lebuh anak nya diturun ari rumah, indu ke mai iya nya mesti belalau ka pua kumbu, awakka iya tegap kaki, tegap jari. Lebuh pulai ari ai, asuh duduk dulu ba setawak, ngambika iya teguh baka tembaga. Udah tembu nya, seduai mindai tauka sebarang sapa ke mai anak mit nya tau dibiau enggau manuk lalu tau ditatap enggau ai penyelap ngichaka iya chelap embap gerai nyamai, nadai apa, nadai nama.

Ku Ikan Juak, enti semua nya udah dititihka magang, sida tetap enda saru ka anak mit nya, lalu enda betangkapka kaki iya sengapa.

Aum pan nyau abis. Nyadi telu tuga igi ke diperam Tuk Turau nya pan nyau mechah magang. Orang gaga magang laban bisi peturun Pung Kapung ke tau ngajih kayu buah ngasuh bebuah. Tang taja pia, sida tiga nya pandak kaki sepiak magang. Kebuah pia, laban lebuh indai sida betelu, apai seduai indai sama bisi megai kaki naka seduai ke timpang udah bekau kena tegam Ikan Juak. Kaki burung nya agi mengkang pandak sepiak nyentuk ka sari tu.

Ari nya meh kebuah bala kitai Iban nemu bepanti pemali sebarang utai gaga, sebarang utai pegai lebuh maya bini ngandung. Nyadi penti pemali nya agi mengkang dikingat kitai bansa sereta ditith sampai ka seharitu.