Tanya Indu

Di kena nyadika jaku pemuka senentang leka main tanya indu tu, dulu aku ngenang ngelansa pasal kitai Iban ti merambu deka jadi melaki bebini nitihka adat enggau sempekat asal kitai bansa. Nyadi, chara tauka adat kitai Iban jadi melaki bini tu bisi 3 macham. Iya ke-terubah iyanya “Nanya Indu”, ke-2 nya “Anjung Lekaki”, lalu ke-3 nya “Nama ke Diri”.

“Nanya Indu” tu pengawa Adat, lalu “Tanya Indu” tu pengawa ti bebungaika jaku maya pengawa “Nanya Indu”. Selalu iya, enti orang besebutka pengawa ti Nanya Indu, dia dih indu deka nitihka lelaki pulai ke menua iya, pulai ke lelaki, reti iya “Nguai” ke lelaki. Terang enggau silik ke-agi senenang ripih pengawa Nanya Indu tu deka dikenang aku dalam karang ti nangkan ke tu ila. Chara ti jadi melaki bini ngena pengawa “Anjung Lelaki” mai reti lelaki “Nguai” ke indu. Lalu adat “Nguai” ti dibai ngena chara “Nama ke Diri” nya bepanggai ba sapa ti nama ke diri ngagai ruang bilik sapa. Enti lelaki nama ke diri, reti iya lelaki nya deka nguai ke indu, lalu enti indu nya nama ke diri ngagai lelaki, reti iya indu nya deka nguai.

Leka ka kitai dulu kenang ngelansa nya tadi, kitai pulai ngenang karang kitai ke sekali tu. Pengawa tauka atur Nanya Indu tu mih ti nyadi sereta mengkang dititih sereta dikena bejadika orang ti deka jadi melaki bini bepun ari kelia nyentukka seharitu. Taja pan kitai Iban di rumah panjai enggau mengeri diatu udah tebal agi jadi melaki bini ngena jalai ti moden, jalai atur adat sigi dipejalaika kitai taja iya enda chulin baka ti dulu, tang ripih pengawa nanya indu nya sigi bisi alaika apai indai lelaki deka dulu mesu ngagai apai indai indu, bebungaika jaku madahka anak bujang diri bisi merambu deka ngambi anak indu sida iya nyadika bini.

Bepanggaika jaku aya Guang Ganda, 74 taun ianya siku lemambang ari Tanjung Sikup, Melupa Saratok lebuh maya iya ditanya ba rumah sida apin lama, iya mandangka jaku “Nunda batang adat Iban kelia, enti lelaki udah mutuska diri deka nyadi enggau indu ke alai iya ngayap, bala sida lelaki sebilik baka apai enggau indai sereta kaban belayan ti bukai patut baum lalu nanya sereta ngemaya haribulan deka nanya indu nya”.

Kena ngepunka pengawa nanya indu, bala ari sepiak lelaki nganjung raban ti mit ngagai sepiak indu. Raban tu mih ti selalu nyengkaum bala sida sebilik tang enda mai apai indai indai indu nya empu, laban raban keterubah tu sigi bala aya enggau ibu lelaki nya, tau kekadang dua tiga iku aja semina dikena bebunga jaku. Reti nya tadi kena ngisik ngagai bala apai indai indu pasal bisi lelaki ke bisi perambu deka nyanay indu nya nyadi ke bini tauka madah bisi apai indai lelaki deka minta indu nya nyadi menantu sida.

Nangkanka pengawa nya, enti apai indai indu setuju nerima perambu tu, nya baru bala sepiak lelaki lalu terus enggau atur nanya indu munyi ke udah disebut dulu tadi. Raban sida sekali tu lebih mayuh agi tubuh sri raban ke ngepun ke jaku tadi. Apa iya seduai indai lelaki nya mega deka sama enggau raban tu, laban maya ke nanya indu tu mih sida lalu nguai pulai ngagai bilik lelaki, taja pan sigi udah nyengala, reti nanya indu nya sigi tuju iya minta undu nya pulai ngagai bilik lelaki taja pan ukai semua nyadi bakanya, laban bisi agi atur ke dikumbai ngambi indu udah bekau tu ila.

Kelimpah ari nya, ba runding penemu aya Gregory Mawar, iya bisi mandangka enti apai indai indu nya enda tentu nemu bejaku, iya tau ngasuh barang sapa ti landik bejaku ngarika iya. Nya kebuah lebuh Iban nurun ngagai rumah panjai indu ti deka ditanya ke iya nyadi bini, sida suah mai lemambang ti landik bejaku sereta pandai nyadaka leka nanya indu nya awak ke ngarika sida bejaku lebuh sida datai ba rumah indu nya lagi.

Tanya indu ianya mega sebengkah ari leka main ti disadaka lebuh maya orang nanya indu ke bini. Nyadi jaku Tanya indu tu jaku ti besilup reti iya, berambai sereta bebungai. Lebuh maya nanya indu, jaku ti nyemetak nadai dikena orang tang ngena jaku bekarung aja. Baka nya mega, apai enggau indai indu nya pan bisi mega nyediaka orang siku ti landik bejaku awak ke bisi nyaup sida ti nanyaka pejalai sereta nimbal jaku pengari ari sepiak orang ti lelaki. Nya alai, rindu amat kitai ninga sida iya betimbal-timbal jaku lebuh beruruska atur nguai enggau enda nguai tauka ngatur adat bebini belaki

Advertisement

Biau

Biau tu jaku terima kasih ngagai Petara, jaku minta pemujur enggau utai ti manah sereta jaku tabi enggau basa dikena nyambut pengabang tauka pemesai. Bisi maya Biau mega disempulangka enggau piring (Enti bisi ngundan leka sampi, lalu tu deka dikenang ba penudi pejurai Biau tu lagi) tang suah agi ke enda. Baka Sampi mega, orang ka miau semina siku aja ba siti-siti serak pengawa, lalu iya meseti megai siku manuk lelaki ti menang pilih dikena bebiau.

Biau begunaka manuk, tang manuk enda meseti dibunuh, enti iya biau adat basa baka pegawa ngelalu ke penatai pengabang. Manuk disayat maya bebiau enti biau nya bisi ngundan sampi – Ngangau ka bala petara. Penerang ti silik entang guna manuk dalam sampi tau dipeda ba tibak karang Sampi ti udah kala dikenang aku dulu agi ari tu.

Leka Main Invokasyen- Sampi

https://ibanpedia.wordpress.com/category/main-asal-iban/leka-main-invokasyen/sampi/

Tuju bansa kitai Iban bebiau nya bisi tiga. Keterubah iya dikena merekat ka utai tauka orang, baka ti merekat ka orang ti belaki-bebini, meri terima kasih, tabi puji enggau ngenataika pengaga ati ngagai Petara (Disempulangka enggau piring enti Biau nya bisi ngundan Leka Sampi minta tulung ari Petara). Ambi ka chunto, Biau Makai Selamat. Kedua nya dikena ngajihka pemanah, pengelantang enggau pemujur tau nyadi, Ambika chunto, Biau Gawai Dayak (Desempulangka enggau Piring). Tuju Biau ti penudi nya dikena muai penyalah, penusah, mimpi enggau burung ti jai lebuh temuai tauka pengabang bisi datai ngulu pengerami ti bisi di-intu kitai, lalu ngelaluka penatai sida, nabi, masa sereta nyambut penatai pemesai tauka pengabang ngagai sebengkah-sebengkah pengerami tauka Gawai,  Ambika chunto, Biau Ngelaluka Pengabang.

Semua utai ti enda manah nya tadi lalu dipanggai ka kitai ba manuk ti enggau bebiau. Udah nya manuk lalu dibunuh lalu semengat ia diasuh kitai madah ka pesan enggau sampi kitai ngagai bala Petara enggau bala aki-ini kitai ti lama udah nadai. Udah temuai tauka pengabang dibiau kitai, sida iya nyadi orang ti beresi lalu kitai ti empu gawai pan enda ditinggang burung tauka mimpi ti jai ti bisi mangka sida tadi.

Biau mega tau bisi ngundan Sampi (Prayer – peminta ngagai Petara) enggau Denjang (Blessing – minta berekat) kelimpah ari ke dikena muai utai ka enda manah. Tang Denjang enggau Sampi tu disebut ba ujung leka biau.

Ngambika chunto dalam leka Biau Pengabang ti bisi diselitka aku ba baruh tu , dulu lemambang meri tabi basa lalu ngelaluka penatai bala pengabang. Iya dulu miau muai burung enggau mimpi ti enda manah. Udah nya baru sida iya meri puji ngagai bala pengabang. Ditangkan ka lemambang nyampi ngagai Petara awak ka pengawa mujur lalu pengujung iya, leka biau merekat bala pengabang enggau orang ka bempu pengawa. Reti nya, biau tu tau ngundan mayuh leka main bukai, nitih ka pengelandik orang ke Bebiau.

 BIAU DIKENA NYAMBUT PENGABANG DITANAH:

Sa dua tiga empat lima enam tuuuuujoh!
Nya alai aku ke bediri kaya-kaya,
Megai selanjau ijau manok banda,
Ukai laban aku bangat galak lain baka.
Aku tu nunda adat lama kitai ke ari kalia selama iya.
Aku tu meri kita tabi, kedua iya adat basa,
Meda kita ke betuboh mua pemaioh betunga mua.
Kita tu endang datai ngena timpuh abis semaia;
Nadai alai kitai ngintai ka mimpi tinduk lina,
Nadai alai kitai ngintai ka igau diau di menoa.

Ba tibak keterubah di atas, lemambang dulu meri “ Tabi Basa” lalu ngelaluka penatai bala pengabang.

Nyangka kita bisi kena sipat mimpi ringat,
Kena pansa mimpi bisa,
Leboh kita ke nepan bas niki kereta,
Sepamanjai jalai sebelah menoa.
Nyangka kita ke bisi laboh pimpin,
Ke bemain ba jalai raya, Nyangka kita bisi raup ke ngelikup mansa mua.
Enti udah kena biau enggau selanjau ijau manok banda,
Nadai iya apa agi ko Petara,
Gerai nyamai ko Raja Selampandai.
Nyangka kita bisi salah igau nyandau malam,
Bisi igau irau begawan,
Nyangka bisi sipat mimpi ringat kena pansa mimpi rawan,
Nyangka leboh kita ke nait bas niki mantuka,
Enggau di semanjai jalai sebelah utan,
Nyangka kita bisi salah pimpin ke bemain sabelah jalan,
Nyangka kita ke bisi labuh raup ke ngelikup kiba-kanan

Ba tibak kedua ba atas tu, sepengudah lemambang ngelaluka penatai pengabang, dia iya lalu miau muai burung jai.

Enti kita udah dibiau aku enggau selanjau ijau manok jelayan tu,                    Tabar iya laar buai ka bukai,
Nya alai ke tu lengka ka aku dulu jako nya.                                                                 Lebuh ngambat pengabang, piring mega bisi dibai orang nurun.

Lalu ba tiba ti penudi dalam leka biau ba atas tu nguan Sampi, minta Petara merekat k pengawa sida.

Leka Main Asal Iban

Leka Main Asal kitai Iban dipechah ngagai tiga bansa tauka kategori bepelasarka tuju sesebengkah pengawa nya. Keterubah iya nya leka main asal Pemerindang, kedua nya leka main asal Adat Basa (Sosio Budaya), lalu iya ka penudi endar nya leka main asal Invokasyen.

Kitai Iban ngembuan mayuh bansa main asal benyawa (Bisi Patah Nyawa tauka Tune) ke ngena tusun jaku ke setimbal sama semunyi dalam mayuh bengkah Pengap, Renung, Ganu, Sanggai, Pantun, Timang Jalung, Timang Kenyalang sereta Timang bukai, Sugi, Dungai, Jawang, Ramban, Pelandai, Sabak, Pelian enggau sekeda main asal bukai. Main asal bukai ke enda ngena nyawa nya baka Sampi, Biau, Ai Ansah, Geliga, Entelah, Ensera enggau ti bukai.

Apin kitai nyelusur ke dalam ka agi ngagai randau kitai ngenang sesebengkah main asal, dulu aku ngenang ngelansa 3 bansa main asal kitai bansa ngambika bala ke enda nemu tau mereti ka seling bida antara main siti enggau main siti.

Main Asal Pemerindangnya leka main ti bekaul enggau pengawa ke digaga bala Iban lebuh maya lemai ari tauka lebuh bisi dikena merindangka pangan diri. Leka Main tu dikena merindang ngelantangka ati, bungah, muji, ngelugi enggau ngelangkung. Kelia menya apin maya bisi radio enggau tibi, tu mih chara bala kitai Iban nyerakup ka kaul enggau pangan. Bala anembiak dia maya hari nyelinting lemai, udah mandi makai semua indah, sigi begempuru duduk begelumu ba ruai nganti sida ke tuai nusi ensera. Ensera tu siti ari main asal pemerindang kitai iban, ensera ditusi pia aja enda benyawa, lalu enti iya ditusui ke ngena chara benyawa (dikana), dia ensera tu lalu dikumbai orang Pelandai (Ensera Keling enti dikanaka dukumbai orang Ensera Bujang Sugi). Leka Main Pemerindang tu nyengkum sida Ai Ansah, Denjang, Dindang, Dungai, Ensera, Entelah, Ganu, Jaku Berambai, Jaku Karung, Main anak Mit, Pantun, Pelandai Karung, Pelandai Ara, Puchau, Ramban, Renung Semain, Sugi Semain enggau ti bukai.

Dalam kelas Main Asal Adat Basa tauka Sosio-Budaya, leka main tu dikena lebuh maya bisi pengerami gawai baka pengawa melah pinang sereta pengerami ke bukai. Adat basa nya tikas peninggi asil intelektual dalam batang pengidup tauka daya idup kitai bansa Iban laban daya idup kitai bansa suah bendar dipancharka ari penalam runding, peninggi adat, pengalus budi, pementas basa enggau pemaiulah ti manah. Chara dikena mantaika ukur tu suah dirintai tauka dikereja ngena leka main baka sida Geliga, Renung Adat, Dungai, Pantun Puji, Kujuk Panggang, Tanya Indu, Ambi Lelaki, Nan/Muka Kuta enggau ti buai. Chunto leka main tu mandangka adat sereta basa ti tau diperatika kitai udah tu ila.

Lalu Main Asal Invokasyen nya bekaul enggau pengarap Iban sereta ngelebihka pengawa ke bisi kaul enggau Petara baik iya maya gawai ti bekaul enggau umai, lebuh ngubat orang ke sakit tauka lebuh bisi pemati. Leka main ti disebut dalam tusun invokasyen tu ngerintaika bansa main asal ti dikena ngagauka Petara. Main asal Invokasyen nyenkaum sida Sampi, Biau, Pengap, Sabak, Pelian, Timang, Renung, Sugi Sakit, Pelandai Sakit enggau ti bukai. Enti ngesuhka main asal Invokasyen tu maya ka bisi gawa, iya meseti disempulangka enggau Piring Ading.

Nengkebang Dunya Mansang

Niat ati aku nengkebang ruai tu alai aku bekunsika cebik penemu mimit ngenang diri ka chukup pemerinsa begigaka penyanding penemu maya aku ke bejalaika pansik ngaga “Research” ti bekait enggau MAIN ASAL IBAN laban tau disebutka nadai penyanding penemu ti nyata enggau nyemetak ngenang siti-siti main asal kitai Iban dalam dunya internet ti mungkur dunya mansang tu.  Terima kasih besai diberi ngagai aya Gregory Nyanggau Mawar ti enda nemu leju nyaut tanya aku ari suba nyentukka saritu, pia mega ngagai aya Rintai Edmond ti enda nemu lembau nguluka tudah aku sereta ngaturka pejalai betemu enggau sida ke tuai ti landik amai sereta dalam penemu dalam pengawa asal kitai bansa.

Main Asal Iban tu siti ari identiti kitai bansa ti ngasuh kitai jauh ngelui ari segi litaricha enggau pengayajaku ari raban bansa bukai. Jarang bansa bukai ke enda muji raban bansa kitai Iban laban ngembuan pengelandik ngena sereta ngaga leka jaku ke setimbal dalam main kena betundi tauka dikena dalam pengawa begawai enggau pengawa rama sereta pengerami baka melah pinang tauka pengerami bukai ba rumah panjai.

Orang ti selalu didinga kitai muji pemanah enggau pengaya jaku kitai nya nadai lebih agi ari bala ribai ke bisi ngadu pansik dalam main enggau adat asal bansa Iban ari kelia ngagai diatu. Enti kitai kala macha sekeda bup dalam jaku Inglis ke ditulis bala sida Prof Derek Freeman, Prof Clifford Sather, Malcolm MacDonald, Ling-Roth enggau sekeda scholar ke bukai, kitai tetap temegah ati ninga puji sida pasal jaku enggau pengaya main sereta adat asal kitai Iban.

Freeman madah bala kitai Iban tu ‘Master of Language‘. Ku Freeman, kita Iban pandai ngena jaku, ba jalai jaku, ngaga jaku, ngemanahka jaku, landik milih sereta ngeripih leka jaku sereta mega ngembuan mayuh bengkah main ke ngena tusun jaku setimbal munyi, baka ke dikena dalam “poems” enggau “prose” dalam jaku bansa Ribai. Nya nanda ke pemanah jaku kitai standing enggau jaku bala ribai.

Kitai Iban ngembuan mayuh bansa main asal benyawa ke ngena tusun jaku ke setimbal sama semunyi dalam mayuh bengkah Pengap, Renung, Ganu, Sanggai, Pantun, Timang Jalung, Timang Kenyalang sereta Timang bukai, Sugi, Dungai, Jawang, Ramban, Pelandai, Sabak, Pelian enggau sekeda main asal bukai. Main asal bukai ke enda ngena nyawa nya baka Sampi, Biau, Ai Ansah, Geliga, Entelah enggau utai bukai.

Tuat ruai tu didirika aku ngambika ulih dikena ngenang sereta ngenanka pemanah jaku kitai bansa ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang.

Utai ti dipantaika aku ditu endang iya enggi bala mayuh, sigi enda salah diambi tauka dikerembaika ngambika jaku kitai Iban tau ngerembai ngerekai serata dunya laban kitai Iban sigi patut bekunsika buah penemu ti manah enggau pangan diri, baka ke beduaka lampang rusa, bebagika lampang babi, ngenjuk lampang pelanduk, betetakka lampang bayak. Ngambika utai ti berat tau nyadi lempung, utai simpi tau segala, utai bingkuk tau lurus. Bekunsi kitai pengidup ti manah enggau pangan diri ngambi ke bansa kitai tau pegari ditemu dunya, bediri sama tinggi, duduk sama pemaruh enggau bansa bukai.

Taja pia, kasih-kasih mih ka tudah pangan, enti kitai amat begunaka penemu orang, enda salah kitai minta, anang te ngambi pia aja. Kenang-kenang mih tudah pangan dalam penatai penyanding penemu – Credited to Allen Charlie – www.LekaMainIban.WordPress.com

Kepenudi bendar, aku ngarapka laman tu ulih nyadika penyanding penemu ngagai bala pengajar Iban, nembiak redak ke agi belajarka jaku Iban baikka iya di tikas sekula, institut pematih pengajar tauka universiti. Angkat kitai sereta sama pejalai tuju singkang, angkat kitai seringkat baka manyi ninggal ke idang, angkat kitai beripih betitih baka angkis tama lubang.

“Dikelala Damun ari Kayu,Buah ari Langgu, Dikelala Bansa ari Jaku, Dikelala Basa ari Penyiru”.

Allen Charlie