Selamat betemu ba ruai JAKUIBAN.COM – Nampung Kenang Lemambang
Orang ti selalu didinga kitai muji pemanah enggau pengaya jaku kitai nya nadai lebih agi ari bala ribai ke bisi ngadu pansik dalam main enggau adat asal bansa Iban ari kelia ngagai diatu. Enti kitai kala macha sekeda bup dalam jaku Inglis ke ditulis bala sida Prof Derek Freeman, Prof Clifford Sather, Malcolm MacDonald, Ling-Roth enggau sekeda scholar ke bukai, kitai tetap temegah ati ninga puji sida pasal jaku enggau pengaya main sereta adat asal kitai Iban.
Freeman madah bala kitai Iban tu ‘Master of Language‘. Ku Freeman, kita Iban pandai ngena jaku, ba jalai jaku, ngaga jaku, ngemanahka jaku, landik milih sereta ngeripih leka jaku sereta mega ngembuan mayuh bengkah main ke ngena tusun jaku setimbal munyi, baka ke dikena dalam “poems” enggau “prose” dalam jaku bansa Ribai. Nya nanda ke pemanah jaku kitai standing enggau jaku bala ribai.
Kitai Iban ngembuan mayuh bansa main asal benyawa ke ngena tusun jaku ke setimbal sama semunyi dalam mayuh bengkah Pengap, Renung, Ganu, Sanggai, Pantun, Timang Jalung, Timang Kenyalang sereta Timang bukai, Sugi, Dungai, Jawang, Ramban, Pelandai, Sabak, Pelian enggau sekeda main asal bukai. Main asal bukai ke enda ngena nyawa nya baka Sampi, Biau, Ai Ansah, Geliga, Entelah enggau utai bukai.
Tuat ruai tu didirika aku ngambika ulih dikena ngenang sereta ngenanka pemanah jaku kitai bansa ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang.
Utai ti dipantaika aku ditu endang iya enggi bala mayuh, sekeda nya anak penemu diri, sekeda nya diambi ari sida ke nemu agi, sigi enda salah diambi tauka dikerembaika ngambika jaku kitai Iban tau ngerembai ngerekai serata dunya laban kitai Iban sigi patut bekunsika buah penemu ti manah enggau pangan diri, baka ke beduaka lampang rusa, bebagika lampang babi, ngenjuk lampang pelanduk, betetakka lampang bayak ngambika utai ti berat tau nyadi lempung, utai simpi tau segala, utai bingkuk tau lurus. Bekunsi kitai pengidup ti manah enggau pangan diri ngambi ke bansa kitai tau pegari ditemu dunya, bediri sama tinggi, duduk sama pemaruh enggau bansa bukai.
Kepenudi bendar, aku ngarapka laman tu ulih nyadika penyanding penemu ngagai bala pengajar Iban, nembiak redak ke agi belajarka jaku Iban baikka iya di tikas sekula, institut pematih pengajar tauka universiti. Angkat kitai sereta sama pejalai tuju singkang, angkat kitai seringkat baka manyi ninggal ke idang, angkat kitai beripih betitih baka angkis tama lubang.
“Dikelala Damun ari Kayu, Dikelala Buah ari Langgu, Dikelala Bansa ari Jaku, Dikelala Basa ari Penyiru”.
admin@jakuiban.com
JAKUIBAN.COM 
Tulis maioh agik ka pasal kitai iban.
idup iban..
slmat tengah hari…syalomm
aku ka betanya. Kati cerita suba asal usul tentang bedarak/miring??
ati urang iban bedarak atau besampi atau berdoa, sapa ke dituju??
sapa Petara paling tinggi? Sapa Tuhan bagi urang Iban?
Terimakasih saudara..GBU
Enti enda salah aku, asaika udah aku nyaut tanya nuan nya ba FB page Ibanpedia. Tang enti nuan agi bedau entu ngeretika utai ti dipadahka aku, nuan sigi semampai tau nanya baru. All the best with your Masters. 🙂
Ulih meri link agai saut nuan dalam FB nuan nyak, ngal?
Pretty! This has been a really wonderful post. Many thanks for providing this info.
Rindu mt ku maca jko dlm bktok…bka jko silup cda k tuai dulu suba…