Leka Main Asal kitai Iban dipechah ngagai tiga bansa tauka kategori bepelasarka tuju sesebengkah pengawa nya. Keterubah iya nya leka main asal Pemerindang, kedua nya leka main asal Adat Basa (Sosio Budaya), lalu iya ka penudi endar nya leka main asal Invokasyen.
Kitai Iban ngembuan mayuh bansa main asal benyawa (Bisi Patah Nyawa tauka Tune) ke ngena tusun jaku ke setimbal sama semunyi dalam mayuh bengkah Pengap, Renung, Ganu, Sanggai, Pantun, Timang Jalung, Timang Kenyalang sereta Timang bukai, Sugi, Dungai, Jawang, Ramban, Pelandai, Sabak, Pelian enggau sekeda main asal bukai. Main asal bukai ke enda ngena nyawa nya baka Sampi, Biau, Ai Ansah, Geliga, Entelah, Ensera enggau ti bukai.
Apin kitai nyelusur ke dalam ka agi ngagai randau kitai ngenang sesebengkah main asal, dulu aku ngenang ngelansa 3 bansa main asal kitai bansa ngambika bala ke enda nemu tau mereti ka seling bida antara main siti enggau main siti.
Main Asal Pemerindangnya leka main ti bekaul enggau pengawa ke digaga bala Iban lebuh maya lemai ari tauka lebuh bisi dikena merindangka pangan diri. Leka Main tu dikena merindang ngelantangka ati, bungah, muji, ngelugi enggau ngelangkung. Kelia menya apin maya bisi radio enggau tibi, tu mih chara bala kitai Iban nyerakup ka kaul enggau pangan. Bala anembiak dia maya hari nyelinting lemai, udah mandi makai semua indah, sigi begempuru duduk begelumu ba ruai nganti sida ke tuai nusi ensera. Ensera tu siti ari main asal pemerindang kitai iban, ensera ditusi pia aja enda benyawa, lalu enti iya ditusui ke ngena chara benyawa (dikana), dia ensera tu lalu dikumbai orang Pelandai (Ensera Keling enti dikanaka dukumbai orang Ensera Bujang Sugi). Leka Main Pemerindang tu nyengkum sida Ai Ansah, Denjang, Dindang, Dungai, Ensera, Entelah, Ganu, Jaku Berambai, Jaku Karung, Main anak Mit, Pantun, Pelandai Karung, Pelandai Ara, Puchau, Ramban, Renung Semain, Sugi Semain enggau ti bukai.
Dalam kelas Main Asal Adat Basa tauka Sosio-Budaya, leka main tu dikena lebuh maya bisi pengerami gawai baka pengawa melah pinang sereta pengerami ke bukai. Adat basa nya tikas peninggi asil intelektual dalam batang pengidup tauka daya idup kitai bansa Iban laban daya idup kitai bansa suah bendar dipancharka ari penalam runding, peninggi adat, pengalus budi, pementas basa enggau pemaiulah ti manah. Chara dikena mantaika ukur tu suah dirintai tauka dikereja ngena leka main baka sida Geliga, Renung Adat, Dungai, Pantun Puji, Kujuk Panggang, Tanya Indu, Ambi Lelaki, Nan/Muka Kuta enggau ti buai. Chunto leka main tu mandangka adat sereta basa ti tau diperatika kitai udah tu ila.
Lalu Main Asal Invokasyen nya bekaul enggau pengarap Iban sereta ngelebihka pengawa ke bisi kaul enggau Petara baik iya maya gawai ti bekaul enggau umai, lebuh ngubat orang ke sakit tauka lebuh bisi pemati. Leka main ti disebut dalam tusun invokasyen tu ngerintaika bansa main asal ti dikena ngagauka Petara. Main asal Invokasyen nyenkaum sida Sampi, Biau, Pengap, Sabak, Pelian, Timang, Renung, Sugi Sakit, Pelandai Sakit enggau ti bukai. Enti ngesuhka main asal Invokasyen tu maya ka bisi gawa, iya meseti disempulangka enggau Piring Ading.
JAKUIBAN.COM 
manah amat blog nuan tu wat ngambika bisi alai bala nembiak rebak baru serta ke lama(baka kami tu) belajar ke adat asal kitai Iban. aku ke tuai gi tu enda tentu nemu adat serta main asal kitai Iban, leka jaku Iban ke bendar pan enda ditemu ambis. pajak ke blog tu ngambi bisi dibaca bala….semak tauka jauh.
Terima kasih. Nya mih, mupuk begadai2 mih tudah pangan nambahka pemisi blog tu, dikarapka dudi ila tau nyadika penyanding pemenu nembiak redak dudi hari. 🙂
Selamat pagi sir Allen. aku amat temegah ati maca buah runding nuan ba blog tu. cukup manah, cukup bepenemu. Laban baka kami ke agi besekula, endang rindu endar maca penemu pasal Bahasa Iban. Terima kasih, sir.
Selamat pagi ngagai nuan mega Pris.
Kitai Iban endang iya patut bekunsika buah penemu ti manah enggau pangan diri, baka ke beduaka lampang rusa, bebagika lampang babi, ngenjuk lampang pelanduk, betetakka lampang bayak laban buah ubi enti laun di kali buruk di pun, buah empasa enti laun di empa lunggar taun. Terima kasih ngagai sukung nuan lalu ngarapka nuan ulih nemuai belama mih kitu laban mayuh agi buah runding sereta kereban deka dipasukka aku kitu nganti maya ka bisi lepa mimit. 🙂
selamat pagi..salam 1 Malaysia….
manah amat blog nuan tu Wat…teruska berkongsi penemu enggau bala mayuh….bisi vokal leka main iban ba blog nuan tu? enda sempat explore…:)
terima kasih….
Main asal dindang bisi di tanya dalam teks pelajar nembiak primary 5 tang nadai chunto..minta tolong bala admin ngayan ka chunto leka main enggau video patah nyawa enti bisi.