Penti Pemali

Nunda ku cherita tuai, di Pulau Borneo tu menya semina dua iko melaki bini aja, iya nya burung Pung Kampung seduai bini iya ke tau ngajih semua kayu buah bebungai lalu bebuah.

Kadir Umbat dalam bup iya Pong Kapong ( BLB, 1974 ) bisi mega ngenang pasal kebuah burung nya nemu asal meri mandi. Kebuah pia, laban bisi penanggul terubah seduai meri mandi anak seduai iya empu. Nyadi lebuh baru meri anak seduai mandi ba batang ai, lebuh baru nyungga anak, kaki anak mit nya sepiak lalu ditagup ikan juak. Kaki iya lalu putus. Ari nya tadi kaki anak burung nya mina tinggal sepiak aja. Nyau kelama, tapa kaki nya tumbuh baru ,tang meh pandak mimit.

Udah bekau penusah kaki anak seduai ke kena tagup ikan juak, Pung Kapung enggau bini iya lalu mai anak seduai lari ngagai Pulau Sumatera. Nya alai bala ke tinggal ba Pulau Borneo tussah amat ati ditinggal sida laban nadai orang tau ngajih ka kayu buah ngasuh iya bebingai lalu bebuah. Nyau kelama udah sida ke rari ngagai Pulau Sumatera, semua utai idup di Pulau Sumatera pedia amat laban kayu tak nadai bebuah. Laban nadai orang bukai kelimpah ari Pung Kampung enggau bini iya ke tau ngajih ka kayu buah berbuah, nya alai semua sida setuju ka seduai melaki bini nya diambi pulai ari Pulau Sumatera. Taja pia, sida dulu betalat sapa ke patut diasuh ngambi seduai pulai ngagai Pulau Borneo.

Ikan ai tabar lalu nyaut madah sida enda ulih meraka tasik. Ular pan nyaut madah sida nadai kaki lalu enda tersemerai ka ai tasik. Menarat enggau Bandau madah sida enda makai buah, lalu nadai kebuah sida patut diasuh ngambi.

“ Kami endang enda makai buah, lalu nadai kebuah kami begunaka Pung Kampung. Gaga meh enti kita mati, laban kami lalu makai but kita,” ku seduai. Ninga jako seduai munyi nya,bala mauh diak pedis magang ati ngagai Menarat seduai Bandau sereta lalu nyumpah seduai iya.

“ Kita menarat enda tau niki kayu, enti bansa kita bisi niki kayu, kita labuh,” pia ku jaku sumpah orang mayuh. Sumpah nya agi bisa sampai ke saritu. Bala jelu bukai nyaut madah sida enda ulih meraka tasik. Bansa burung pan nyaut ga madah sida amat tau terebai tang tasik patut diperaka nya kelalu besai lalu nadai alai sida inggap.

Udahnya baru bansa indu utai nyaut. Ku Kesulai, “ Kami duai Bebari tu meh dulu nguji ngambi pulai Pung Kampung enggau bini iya. Udah nguji nya baru nemu ulih enggau enda.” Bala ke gempuru dia sama setuju. Kesulai enggau Bebari lalu mupuk terebai. Nyau beberapa hari seduai pan datai ba tebing tasik. Nasit bisi runding, lebuh meda papung batang,seduai lalu inggap dia. Majak rarat meh papung batangnya, siang malam petang. Nyau beminggu, datai meh papung batang nya ba tebing Pulau Sumatera.

Mayuh dah alai seduai betanya, nya baru seduai betemu enggau Kusing ke madah alai Pung Kapung diau, iya nya puchuk ragai tebelian. Seduai lalu terebai ngiga ngagai endur nya lalu mujur tetemu ka Pung Kapung. Tang burung nya madah sida enggai agi pulai ngagai Pulau Borneo taja pan anak seduai ka timpang kaki nya nyau amat bujang. Taja pia Pung Kapung madah bini iya bisi ninggal tiga igi telu ba punggu kayu temesu ba tucung Bukit Kinabalu.

“ Kita tau ngasuh burung Tuk Tarau meram telu nya.” Ku bini Pung Kapung.

Ningga nya seduai lalu beguai angkat pulai. Datai ba Pulau Borneo, lalu madah berita nya. Seninjik endar telu tiga igi nya bedau manah nadai dikacau utai. Nyadi nganti Tuk Tarau ke meram telu, bansa mensia lalu diasuh matak aum sereta ngempuru semua utai enseput baru laban deka nitah raja bansa sebengkah-sebengkah.

Laban menua nya nadai jelu singa, nya alai bala jelu nitah Aji Bulan nyadi raj tang bepun ari iya ke mai beban perau lalu ujung-ujung ambi iya nyadi kerituk pending, nya alai iya lalu tebuai jadi temuai. Jelu bukai lalu manchak iya enggau kentut sida. Nya alai Aji Bulan balat bau tengung. Sida milih burung Pipi Awung jadi Raja burung lalu ngangau iya enggau nama Burung Raja. Bulu iya burik. Orang lalu milih burung Kunchit seduai Kempat Tiang jadi semata-mata semua burung. Seduai selalu mintih sebarang sapa ke ngelanggar adat, nyengkaum Menaul ke selalu minta diri makai malam.

Manuk pan bisi ga minta diri nyadi Raja, laban gamal sida sigat,sereta landik mengkukuk. Tang ku bala mayuh, “ Kita manuk enda tau nyadi Raja,laban kita enda ulih ngidupka diri empu, enti enda ditupi anak mensia. Ninga bantah nya, manuk lalu terebai ngerencah semua puchuk pala orang mayuh lalu pegari tai manchak tudah Munsang.

Orang mayuh lalu nyumpah manuk,”Enti bala anak mensia renga, pedis pala tauka jai mimpi salah hari, biau kita enggau manuk ngambika iya tabar laar.”

Nyadi Munsang tu ensepi udah dipanchak Manuk enggau tai, lalu bejaku madah sida Munsang enda tau meda manuk, laban sida lalu deka nangkap sereta diempa matak. Bala ular lalu milih Tedung jadi Raja Ular. Enda mukaii-mukai laban ke gali garing-garing semak kaki anak mensia, iku iya lalu kena indik mensia. Dia deh iya lalu mantuk tumbit nembiak nya. Meda bakanya mensia lalu nyumpah Tedung.

Ku iya, “ Sejeman dunya tu ila, kita Tedung enda tau meda anak mensia, laban enti kita bisi meda, tujuh hari udah bekau nya, kita enda tulihka pemakai.”

Nya munyi sumpah anak mensia enggau Ular Tedung, lalu nyentuk ka seharitu, semadi iya suntuk, nya baru bisi dipeda kitai. Semah dititah nyadi Raja Ikan. Udah Semah kena pilih, bala anak mensia lalu nanya penemu bala mayuh, “ Kati ku Ikan Juak ke nangkap kaki anak Pung Kapung, bisi penyalah utai bakanya?”

Semua bala ke dia bela madah pengawa Ikan Juak nya salah. Sida lalu nyumpah Ikan Juak, “ Nya alai ari diatu nyentuk ke sejeman kita nguan dunya tu, bala suku juru kita enda tau makai buah, kita mati.” Sumpah nya nyerangkung ikan Adung mega laban nya sida sekaban, mina enda sama kengkang. Sampai ka seharitu dua bansa ikan nya mmali makai buah. Ninga munyi nyak, Ikan Juak bisi gak nyaut mimit. Sida ngaku sallah sereta lalu meri jaku ajar mimit pasal jalai meri anak mandi. Ikan Juak nya madah sekeda adat enggau jalai terubah meri anak mandi ba batang ai tauka ba sungai.

Ka tanda anak mit nya lelaki, piring enda tau enda engkah ba kelingkang,lalu sayap manuk mesti ditali enggau ubung mirah sereta tanchang ba gansai lalu entak ba tisi tebing ai awakka bala ikan nemu nya anak lelaki. Ari nya, bala sida ikan lalu tau nyumpah ngambika anak mit nya udah tuai ila tau serang, tau pandang, tau kayau, tau pulau.

Kena nandaka anak mit nya anak indu, Ikan Juak nya ngajar ngasuh naka mensia ngena leletan alai Nanchang ka kelingkang enggau bulu sayap manuk. Sida lalu tau nyumpah amak mit nyangambika iya tau nakar, tau gaar, tau ngebat tau ngikat.

Anak mensia lalu diajar Ikan Juak ngasuh sida nyampi lebuh meri anak mit mandi, ngangau bala Raja Genali, Raja Lelabi, Raja Ikan, Raja Gemian, Raja Semah, Raja Tapah. Tu batang leka sampi meri anak mandi tang tau nambah enggau sampi berpinta sereta ngerintai bala tuai, bala petara aki, petara ini. Tembu besampi, nya baru muai piring siti ngagai ai, ambi ka tasih ai reti iya.

Lepas nya baru tau nabur ke beras kuning enggau letup ngicaka aji jadi tabar laar. Orang ke nyampi tadi lalu mantap ai enggau duku, ngambika ai nya enda bias.

“ Udah nya baru tau munuh manuk tauka babi ari ulu indu ke nyungga anak mit nya meri mandi. Darah nya tau nyadi ka terabai anak mit, ngasuh iya taan tubuh, panjai umur, gayu guru sereta jauh pejalai enti iya lelaki,” ku iya.

Ikan Juak pan ngajar ngasuh lebuh anak nya diturun ari rumah, indu ke mai iya nya mesti belalau ka pua kumbu, awakka iya tegap kaki, tegap jari. Lebuh pulai ari ai, asuh duduk dulu ba setawak, ngambika iya teguh baka tembaga. Udah tembu nya, seduai mindai tauka sebarang sapa ke mai anak mit nya tau dibiau enggau manuk lalu tau ditatap enggau ai penyelap ngichaka iya chelap embap gerai nyamai, nadai apa, nadai nama.

Ku Ikan Juak, enti semua nya udah dititihka magang, sida tetap enda saru ka anak mit nya, lalu enda betangkapka kaki iya sengapa.

Aum pan nyau abis. Nyadi telu tuga igi ke diperam Tuk Turau nya pan nyau mechah magang. Orang gaga magang laban bisi peturun Pung Kapung ke tau ngajih kayu buah ngasuh bebuah. Tang taja pia, sida tiga nya pandak kaki sepiak magang. Kebuah pia, laban lebuh indai sida betelu, apai seduai indai sama bisi megai kaki naka seduai ke timpang udah bekau kena tegam Ikan Juak. Kaki burung nya agi mengkang pandak sepiak nyentuk ka sari tu.

Ari nya meh kebuah bala kitai Iban nemu bepanti pemali sebarang utai gaga, sebarang utai pegai lebuh maya bini ngandung. Nyadi penti pemali nya agi mengkang dikingat kitai bansa sereta ditith sampai ka seharitu.

Advertisements

7 Burung Mali (Beburung) – The 7 Omen Birds

Sengalang Burung seduai bini ia beranak ke tujuh iku anak indu enggau siku anak lelaki. Semua anak indu Sengalang Burung jadi enggau Burung Mali (Omen Mird), nya alai semua ia 7.

Endu Dara Tinchin Temaga Endu Cherebuk Mangkuk China jadi ke Burung Ketupung.

Endu Langgu Ketunsung Ngerembai, Dayang Kumang Bungai Entekai jadi ke Burung Beragai.

Endu Kechapah Dulang Midung, Dayang Kumang Ketunsung jadi ke Burung Bejampung.

Endu Bentuk Chincin Pengabas, Endu Letan Pulai Emas jadi ke Burung Pangkas.

Endu Kechapang Dulang Mas, Iyak Ketupung Bungas Libas jadi ke Burung Embuas.

Endu Mua Puchung Pengabas, Pinggai Besai Nadai Meretas jadi ke Burung Papau.

Endu Dara Chempaka Tempurung Alang, Patri Langit Dayang Kumang jadi ke Burung Malam.

Kengka ke siku-iku anak lelaki Lang Segalang Burung ianya Aji Berani Ngilah Bulan, Entri Suka Raja Rengayan jadi enggau anak Raja Sempulang Gana ti benama Endu Sintung Benih.

Nyadi diatu kitai ngenang laki 7 iku anak indu Aki Lang Sengalang Burung, nitih ka jurut ari 1 ngagai 7, ya ke 1 nya ka paling bisa.

7 Burung Mali (7 Omen Birds):

1. KETUPONG (Rufous Piculet)
Ketupung tu kekadang dikumbai orang EntisKetuai burung mali tujuh iku. Iya menantu Lang Sengalang Burung. Kitai pechaya ke burung Ketupung tu tu burung tengkelak, baka orang tunggal jaku reti ia ngasi, bekuasa, enda tau enda dititihka (authorritative and deliberate). Mayuh orang ngumbai ketupung nya jaluh tauka kikih iya ke bendar, ketupung tu sebansa burung belatuk ti mangah. Dalam timang, Ketupung dikangauka lemambang enggau nama Enting Naing Besumbing Tulang, Raja Taka Nempurung Balang, diau di Tapang Undang nyempayan bungkung, Rajang Nunggi nunggang baka tumbang gempung jejabang Ketupung jadi ke anak Lang Sengalang Burung ke Benama Dara Tinchin Temaga, lalu beranak ke anak lelaki siko benama Gom ti jadi ke Serani Bungsu Tedung ari Panggau Libau.

2. BERAGAI (The Scarlet-Rumped Trogon)
Beragai tauka kedua bali nama Beragai Sematai Menang Burung, diau ba rumah panjai Lang Sengalang Burung lalu bilik iya nangkan bilik Ketupung. Beragai tu anak Bujang Sebabang Bunga Rangkai. Enti orang ninga munyi Beragai dulu agi ari munyi Ketupung, reti nya burung iya manah laban nya ngayuka iya deka bulih padi tang enti munyi Beragai di dinga dulu ari Bejampang, reti nya ruang bilik orang ke ninga deka ditinggang penusah.

3. BEJAMPUNG (Cristed Jay)
Bejampung tu anak Bujang Kengkang Kerama ti jadi ke Endu Kechapah Dulang, Dayang Kumang Bunga Kenunsung. Nitihka penemu org tuai, Bejampang tu lansik amat ninga lalu jampat amat ngelala. Iya mega ngembuan mata ke lansik (keen sighted) enggau pending ke lansik (sharp hearing). Dalam pengarap kitai menya, lemambang selalu ngangauka Bejampung ngena nama Bujang Kumang Menua Aji, Sengkajang Rejar Batang Munyi, Bujang Berumpang Rarung, Puchuk Ke Tugang Nunggang Tansang, Anak Munsang Ngemata Menua.

4. PANGKAS (Maroon Woodpecker)
Pangkas tu seraban ari burung belatuk ti dikumbai kutuk. Iya anak Bujang Lachau Kurin, jadi ke Endu Punggang Leletan Pulas, endu Bentuk Tinchin Pengabas, Endu Leletan Bujang Emas.

5. EMBUAS (Banded Kingfisher)
Embuas tauka membuas tu anak Raja Taka. Kenu ku cherita tuai, munyi embus nyelai amat iya nya baka munyi “orang ke mentas jaku” . Nya kebuah iya dikumbai orang burung kasih tauka burung sinu tang iya mega selalu dikumbai orang burung berat ketegal ti suah mai berita ti enda menuku.

6. PAPAU (Diard’s Trogon)
Papau tu anak Lalak Pala ba rumah panjai Lang Sengalang Burung , lalu iya mega dikumbai Senabung , Munyi pau pau pau selalu didinga ba kampung puang sereta jarang ditujah mensia. Tang, taja baka nya munyi Papau kekadang baka munyi orang manjung gaga. Nya kebuah iya selalau dikumbai burung panjung tauka kelabu Papau nyenabung. Lebuh munyi iya didinga baka nya, iya dikumbai burung darah. Kitai Iban selalu takut ninga munyi Papau laban munyi burung tu mai rita pemati. Taja bakanya munyi, papau mega bisi mai reti ti manah laban Iban pechaya Petara deka ngelindung sida ia ari utai ti jai baka serang kayau ari munsuh. Sema jaku kitai ninga munyi Papau ba rantau jalai kitai pulai ari umai tauk ari kebun, munyi burung nya mai reti ti manah. Tajapan penusah bisi datai nuntung, kitai deka selamat ditulung kuasa Petara. Nya kebuah kitai Iban arapka kediri ninga munyi Papar sebedau nurun ngayau, laban reti nya Petara deka nulung mandung sida. Nitihka jerita tuai, antu tau madamka suluh buta (ngajih ke munsuh buta) lebuh munsuh nyerang sida ba rantau jalai. Nya Papau dikumbai Burung Bula.

7. NENDAK (White-Rumped Shama)
Nendak diau enggau indai iya ba bilik di pelabuh. Nendak tu enda bebini. Lebuh bumai, orang ngarapka diri bisi ninga munyi iya laban iya mai reti ke chelap, mai pengelikun sereta pengelantang. Nya kebuah Nendak dikumbai burung chelap. Maya bumai tauka pindah ke rumah baru, orang suah ngangauka burung Nendak maya besampi.

Nampung kenang ke udah bisi dilansa aku ba atas tadi. Kelimpas ke ari 7 iku burung mali ke dirintaika aku ba atas, siku agi burung ka balat endar besai reti dalam pengidup kitai Iban kelia ianya Kenyalang. – Ari pemesai reti burung ti, nya kebuah Gawai Burung dikumbai orang Gawai Kenyalang mega.

Kenyalang (Rhinoceres Hornbill) suah disebut dalam timang lebuh maia Gawai Kenyalang tauka timang amat. Lemambang ti ngesuhka leka timang Kenyalang selalu nyebut kenyalang tu dikirumka Petara nyaup bala ngayau ngalahka munsuh. Ngambi ka banding burung kenyalang datai bepuluh puluh iku lalu mantuk sereta ngemutaka mata munsuh. – Dikena ngingatka tulung ari burung kenyalang tu, replika tauka pentik burung kenyalang didirika ba tiang di tanju lebuh maia orang miring begawai. (Gawai Burung/Gawai Kenyalang).

Jalai Pengarap Lama Iban – Beburung

Kitai iban kelia pechaya ka setiap utai ka idup nya bisi semengat magang. Aku bisi mejuraika tauka negu entang pengarap kitai ka pechaya ka petara/antu datai dalam kenyap/mimpi, bejaku tauka nulung. Lalu, aku mega bisi madahka penemu kitai Iban ka arap/pechaya ka petara bejaku ari/nengah burung, lalu ari burung tu tadi, nentuka patut tauka enda patut kitai bejalaika sebarang pengawa.

Kitai Iban dulu menya pechaya amat ke bunyi burung dikena nentuka nasit siku orang ti ninga iya. Ari tu tadi meh penatai Pengarap Beburung dalam pengidup Iban menya. Kenu ko orang tuai, Petara ngena munyi burung dikena ia nguasa pengidup mensia.

Kelimpah ari Lang Sengalang Burung, bisi 7 iku burung ti besai amat reti dalam sistem pengarap lama kitai, iya nya Ketupung, Beragai, Bejampung, Pangkas, Embuas, Papau enggau Nendak. – Dalam leka Timang tauka Pengap, sida tu dikumbai kitai Aki Ketupung, Aki Beragai, Aki Bejampung, Aki Pangkas, Aki Embuas, Aki Papau enggau Aki Nendak.

Nitih ka jerita tuai, semua tujuh iku tu mali magang, lalu sida tu jadi enggau anak Lang Sengalang Burung, reti nya sida ia tujuh iku tu tadi menantu ia magang.

Nyadi dulu bejurai ke pasal Aki Lang Sengalang Burung (Brahmany Kite), kedua bali nama Ia Aki Jugu Menaul Tuntung, entua segala burung mali. Lang Sengalang Burung diau ba Bukit Tutup ba kampung Sungai Merakai. Lalu rumah panjai alai iya diau dikumbai orang Tansang Kenyalang.

Aku kala nanya aya Gregory Nyanggau Mawar nama kebuah Kenyalang berita nama di serata negeri Sarawak? Lalu nama kebuah Kenyalang digaga maya orang bedirika Gawai Kenyalang enggau pentik nya diguna maya Gawai Burung. Nama kebuah tau bisi Timang Kenyalang? Aku nanya pia laban ngenang Petara Aki Lang Sengalang Burung nya mali diri nyadi Burung Lang, lalu ngenang 7 iku menantu iya nadai siku gak bali Kenyalang. Dipelabaka aku, tanya tu kala mansa ruding bala pemaca mega. Lalu tu saut iya:

Kenyalang tu Raja Burung. Iya tu mih ti nyadika entara dunya mensia enggau petara. Kebuah engkeramba kenyalang digaga ngambika Petara nemu bagi orang ti begawai tauka gawa. (Gregory Nyanggau Mawar)

Lang Sengalang Burung tu anak tuai Raja Jembu enggau bini ia Endu Endat Baku Kansat. Reti iya, Sengalang Burung tu uchu Raja Durung enggau bini ia Endu Cherembang Cheremin Bintang, Tukuh Lawang Pinggai Bekaki.

Sengalang Burung jadi enggau Endu Dara Sentaba Balun Kupak, Indai Kechendai Bepantak Jirak. Lebuh bini Sengalang Burung sakit, dua iku menyadi ia ianya Raja Menjaya (Bebangun nyadi Manang lalu dikumbai Menjaya Manang – Manang Bali) enggau Ini Inda (Ini Andan) ngaga pelian betawai lalu ngerai ka bini Sengalang Burung. Udah nya nama bini Sengalang Burung lalu ditukar ngagai Endu Sudan Berinjan Bungkung, Endu Tiu Tiong Menyarung.

Ba penemu kitai Iban, enti orang tak seruran mayur-ayur tabin bebirin lembau makai, pedera renga lain asai, sakit lengit enda nyamai, reti iya nama iya enda entu sengkeman enggau iya, nyangka iya nya alah bulu. Lalu chara Iban kelia ngatur utai nya ngena chara pelian ti dibelianka manang. Lalu pengudah nya tadi, nama iya lalu ditukar. Asi dikempuk 3 macham, lalu ari 3 macham kempuk asi nya tadi, tiap siti diberi nama, lalu ni bagi kempuk asi ti dulu dipantuk manuk, nya mih nama baru orang nya. (Uti tu deka diterangka aku enggau silik agi ba sukut randau ba apak Adat Asal.)

Sengalang Burung seduai bini ia beranak ke tujuh iku anak indu enggau siku anak lelaki. Semua anak indu Sengalang Burung jadi enggau Burung Mali (Omen Mird), nya alai semua ia 7.

Endu Dara Tinchin Temaga Endu Cherebuk Mangkuk China jadi ke Burung Ketupung.

Endu Langgu Ketunsung Ngerembai, Dayang Kumang Bungai Entekai jadi ke Burung Beragai.

Endu Kechapah Dulang Midung, Dayang Kumang Ketunsung jadi ke Burung Bejampung.

Endu Bentuk Chincin Pengabas, Endu Letan Pulai Emas jadi ke Burung Pangkas.

Endu Kechapang Dulang Mas, Iyak Ketupung Bungas Libas jadi ke Burung Embuas.

Endu Mua Puchung Pengabas, Pinggai Besai Nadai Meretas jadi ke Burung Papau.

Endu Dara Chempaka Tempurung Alang, Patri Langit Dayang Kumang jadi ke Burung Malam.

Kengka ke siku-iku anak lelaki Lang Segalang Burung ianya Aji Berani Ngilah Bulan, Entri Suka Raja Rengayan jadi enggau anak Raja Sempulang Gana ti benama Endu Sintung Benih.

Pengawa beburung dikena Iban nyadika tenggau enggau lalau sebedau ngereja sesebengkah pengawa. Lalu tu mih kebuah Iban enti pindah rumah selalu pindah malam (dinihari), ngicaka burung enda bebunyi, lalu tu mega Iban enti pindah tauka mindah tauka ngambi indu anjung lelaki selalu betabuh.

Kenang ke silik agi entang pengawa beburung enggau siku-siku burung mali tau dibacha ba karang 7 Burung Mali – The 7 Omen Birds.

https://ibanpedia.wordpress.com/category/adat-asal/jalai-pengarap/beburung/7-burung-mali/

Ripih Timang

RIPIH JERITA TAUKA MENUA TI DIKESUHKA DALAM TIMANG

Dalam naratif Timang, kelimpah ari nyebut nama Petara ke udah dirintaika ba karang aku ke dulu ari tu (, lemambang mega bisi nyebut jerita tauka ripih menua ti dipansa dalam leka main tu. Nyadi ripih jerita enggau menua iya nitihka tusun di baruh tu:

  • Bujang Pedang ninga auh ribut lalu rari (Bujang Pedang hears the sound of a mighty wind and runs away).
  • Bini Sengalang Burung chelap bulu (Sengalang Burung’s wife is chilled by the wind).
  • Ribut mangkaka rumah Sengalang Burung (the wind blows hard on Sengalang Burung longhouse).
  • Ngiga kayu rumbang tutong (looking for hollow wood for the drum).
  • Sida Ketupung Mansang ngayau (Ketupung and his friends go to war and looking for fresh head to be brought to the human feast).
  • Menua Besi Api (The land of the flint).
  • Menua Tuchok (The land Tuchok lizard).
  • Menua Sandah (The land of Sandah).
  • Menua Rioh (The land of Rioh insect).
  • Menua Nendak (The land of Nendak bird, white rumped shama).
  • Menua Beragai Samatai Manang Burung (The land of Beragai bird).
  • Menua Kelabu Papau Nyenabung (The land of Kelabu Papau bird).
  • Menua Pangkas tauka Kutuk (The land of Pangkas bird or Kutuk).
  • Menua Bejampung (The land of Bejampung bird).
  • Menua Embuas (The land of Embuas bird).
  • Menua Ketupung (The land of Ketupung bird).
  • Menua Kunding Burung Malam (The land of Kunding).
    Menua Rintung Langit Pengulur Bulan.
  • Bala Ketupung nyurung lalu ngaga langkau kayau (Ketupung and his warriors erect the war hut).
  • Ketupung enggau Beragai matak bala (Ketupung and Beragai led their warriors to war).
  • Bala Ketupung nuntung ba rumah Beduru or Nising (Ketupong’s troop landed at Beduru’s longhouse).
  • Wa Puji (Songs of praise).
  • Wa Empas (Songs of anger).
  • Pulai Ngabas (Return from spying).
  • Sengalang Burung nusui mimpi diri (Sengalang Burong relates his dream).
  • Mimpi Ketupung (Ketupung relates his dream).
  • Mimpi Beragai (Beragai relates his dream).
  • Bala Ketupung ngerampas (Ketupung’s troop start to attack).
    Datai ba tinting pangka sealing pulai nyerang (Arrive at the ridge where the warriors shout victoriously on return from battle).
  • Bini Sengalang Burung nyambut igi balang (Sengalang Burung’s wife receives the precious skull).
  • Aki Lang Sengalang Burung mai ngabang (Sengalang Burung leads his people to attend the festival).
  • Mansa Tembawai Lama Sengalang Burung (passing the old house site of Sengalang Burung).
  • Menua Bujang Jegalang (The land of Bujang Jegalang).
  • Mansa Batu Ansah (Passing the whetstone).
  • Mansa pun buluh berani (passing the foot of Buluh Berani).
  • Pintu Langit (Arrival at the door of the sky).
  • Bala Sengalang Burung ngetu ba pintu langit ke rapit (Sengalang Burung and his followers stops at the closed door of the sky).
  • Menua Aki Ungkuk (The country of Aki Ungkuk).
  • Menalan Sabung (The cockfighting ring).
  • Ngerara rampa menua (Appreciating the view of the landscape).
  • Menua Raja Siba Iba (Raja Siba Iba’s country).
  • Menua Burung Raya (The country of Burung Raya bird).
  • Menua Sera Gindi (The country of Sera Gindi).
  • Menua Bengkung apai Kuang Kapung (the country of Bengkung, father of Kuang Kapung bird).
  • Menalan Besai (a widely cleared space).
  • Menua Bhiku Bunsu Petara (The country of high priest of the god).
  • Menua Selampandai (The country of Selampandai).
  • Menua Raja Rengayung – Kijang (The country of Raja Rengayung the barking deer).
  • Menua Rusa – Bunji (The country of sambar deer).
  • Menua Raja Remaung (The country of the tiger chief).
  • Kendi Aji (The road junction).
  • Kampung Baung (The lonely forest).
  • Menua Aki Dunju (The country of Aki Dunju).
  • Menua Durong Biak (The country of the younger Durong).
  • Menua Bunsu Petara (The country of Bunsu Petara).
  • Menua Bangkung (The landing place).
  • Bala Sengalang Burung mandi (Sengalang Burung and his followers bathes).
  • Bini Sengalang Burung mandi (Sengalang Burung’s wife bathes).
  • Bala Sengalang Burung begari (Sengalang Burung and his followers dressed up for the festival). Bala Indu besanggul (The women plait their hair into buns).
  • Bala Sengalang Burung niki ke rumah (Sengalang Burung and his followers walks into the feasting house).

Nyadi, bakanya mih tadi rintai pengawa enggau jalai menua bala Petara ti diambi ngabang ngagai siti-siti pengerami tauka gawai. Pengawa nimang tu enda ambis naka nya aja laban udah tu ditangkan ke pengawa ngaluka Sengalang Burung.

Pengawa tu dikereja tumu pagi. Tuai gawai tauka tuai pengawa miau ngena manuk sabung kena nandaka penatai Sengalang Burung enggau Petara bukai. Tuai gawai bejalai dulu lalu ditangkanka bala bukai ti miau manuk sabung ngagai bala pengabang (nyengkaum bala Iban enggau bala Petara sereta antu lulu ke enda dipeda).

Udah tuai gawai ke bejalai nya, dia dua iku indu Iban ti endang udah dipilih mai piring ading letup pulut lalu ditangkanka sida ke indu enggau lelaki ke agi biak ti begari ngena ngepan Iban. Sida ke indu megai gelas lalu sida ke lelaki megai butul tuak. Pengawa tu disempulangka sekali enggau munyi tabuh tawak, bebendai, engkerumung enggau gendang.

Udah sida ke ngelingi ruai tiga kali, sida ngetu ba ruai tuai gawai lalu betunga enggau bala bujang  berani sereta enggau pengabang ke bukai. Sida ditunggah, dienah enggau manah baka ti nunggah Sengalang Burung, Petara enggau antu lulu bukai ke bisi dikangau ngabang. Sida tu tadi nyadika pengari bala sida bujang berani ari Panggau Libau baka sida Keling enggau Laja ti sama bela dikangau nitihka timang ti udah dikesuhka lemambang.

Udah nya, lemambang lalu nenjang Sengalang Burung. Ba pengawa tu, lemambang duduk betunga enggau bala pengabang ti pemadu dipebasa (pengari Sengalang Burung) enggau pengabang bukai ti ngarika bala sida menantu iya tujuh iku enggau Petara bukai mega.

Pengawa tu lalu ditangkanka enggau pengawa nyugu babi ti diatur urung pukul 6.30 pagi. Babi nya tadi dibunuh lalu atau iya ditela sida ke landik ngabas sereta macha ati babi. Tembu pengawa nya, pemakai ngagai bala pengabang pan dienahka baru

Main Asal Iban: Timang (Invokasyen)

Timang enggau Pengap tu endang iya begulai, baka Sampi enggau Biau.

Dalam leka main Timang, kitai suah ninga nama Timang Jalung, Timang Kenyalang enggau Timang Tapang. Pengawa timang (chants) tauka pengap tu endang iya bekaul enggau pengarap lama kitai Iban ti dikumbai beburung. Sebedau  pengawa  nimang tu berengkah, piring deka disediaka dulu dikena mujuk tauka nundukka semengat sida ti dikangauka.

Pun penatai timang tauka pengap tu endang iya sigi ari asuh antu tauka Petara ti dikumbai Lang Sengalang Burung.

Agi kelia menya, mensia enggau jelu segulai pendiau. Nyadi, hari siti, Lang Sengalang Burung belaya berebutka rian (Tandan Rian Melunjung) enggau Chung Chelulung Apai Keling, Ribai sereta Sabit  Bekait. Nitihka jerita, pun rian tu ulih ngasilka mayuh macham buah. Nya alai pun tu diperebutka bala sida sebuat nya tadi.

Beduduk ari laya nya ngujungka sida empat tu tadi enda ulih sependiau agi. Nya alai, Apai Keling lalu pindah ngagai Panggau Libau. Ribai pindah ke menua ngilah tasik. Sabit Bekait Anchung Selung Bebelit pindah ke Tuchung Besanjung Sinjang Tati Redai Isang (Towering Bridge) mindah ke langit lalu bala Iban pindah ke Batang Ai. Sebedau bala Iban pindah ke Batang Ai, Lang Sengalang Burung, Apai Keling, Ribai enggau Sabit Bekait madahka bala Iban jalai ke menua sida iya. Enggau nya, sida ngasuh bala Iban mengap tauka nimang ngambika sida nemu kitai Iban ngangauka sida.  (Penerang ti silik pasal kitai Iban enda segulai sejalai agi enggau Petara agi tau dibacha ba apak “Adat Asal – Petara Iban”.)

Lebuh sida ninga nama jalai ti disebut dalam timang tauka pengap nya, sida nemu tekala nya bala Iban minta tulung. Lang Sengalang Burung enggau bala Iban agi meruan manah enggau pangan diri laban seduai nadai enggau berebutka rian maya nya. Sida iya agi sepengabang tang sida ke bukai terus enggai bepeda lalu bemunsuh enggau pangan diri.

 PETARA TI DIKANGAUKA DALAM TIMANG

Dalam timang tauka pengap, nama Sabang Jurai, Bunsu Ribut, Pungga tauka Bungai Nuing bisi disebut ngambika sida ulih nulung madahka bala Petara. Taja pia, orang Panggau Libau tu tau nibuh dikangau laban enti sida ninga munyi tawak, bebendai, engkerumung enggau gendang, nya tanda Iban ngambi sida mansang ngabang. Sida iya deka datai mai pengaruh, sakang enggau ubat padi. Lebuh sida ninga bala Iban nutuk beras tauka ngirau rendai tauka mansuh, nya mega nyadika tanda Iban ngangauka sida ngabang.

Lang Sengalang Burung enggau tujuh iku menantu iya deka nengah Pintu Langit. Pintu tu semina ulih ditukangka Lang Sengalang burung aja. Ari atas din, sida dulu ninjau, deka nemu endur tauka alai Iban begawai. Sida nurun niti emperaja tauka neraja (anak raja) lalu terengkah ba kampung alai sida betemu enggau Petara bukai baka Antu Gayu, Antu Tuah enggau Sempulang Gana. Sida tu deka sereta mansang ngabang ke rumah panjai.

Sebedau niki ke rumah panjai, sida dulu ngetu di pendai (tepian ai) alai sida dulu mandi enggau begari. Tembu besiap, sida lalu niki ke rumah diketuaika Lang Sengalang Burung mai pengaruh kena ngayau lalu Sempulang Gana mai pengaruh kena bumai. Sida ke bukai sama bela mai ubat pata ke sakang seribu guna. Tajapan nadai dipeda mata mensia, sida iya endang bisi datai sereta begulai makai, ngirup sereta bebuti ngelingi ranyai di tengah ruai.

Dalam leka timang mega, kelimpah ari ti nyebut jalai ngagai Petara sereta nama Petara ke udah dirintai ba atas nya tadi, mayuh mega Petara bukai ti dikangauka. Rintai nama Petara bukai ti bisi disebut dalam timang iyanya baka:

Aki Papau, Aki Beragai, Aki Bejampung, Aki Pangkas, Aki Embuas, Aki Ungkuk, Aki Ketupung, Antu Enselua, Antu Gayu, Antu Pugai, Apai Nendak, Apai Terabai, Apai Ketupung, Apai Pengaruh, Apai Beragai, Apai Bejampung, Apai Duku, Apai Embuas, Apai Sangkuh, Apai Tukak, Apai Papau, Apai Pangkas, Beketan, Baya, Chaling, Dumun Iban, Empung Petara Atas, Kampung Dalam, Kuju Anggai, Manang Tugang, Manang Betuah, Manang Jaban, Manang Panjai Berang, Meni, Nenalan Lama, Pintu Langit, Pulang Gana, Rapuh, Remaung, Renduh, Renggan, Sekuang Kapung, Sempandai, Sempandai Tuai, Tangga Emperaja, Tedung enggau Tungkat Maut

Petara Iban

Nitihka penemu asal Iban, dunya tu diserara pengawa mensia lalu diparit ulih dunya ti enda dipeda mata.  (Orang Panggau-Gelung, Bunsu Antu, Petara Aki-ini etb…)

Petara bisi besangkut paut enggau kuasa sereta suah agi munyi ka ditusi tampung ensera enggau pengingat tuai, menua sida tu din ba langit mingkai. Nitihka penemu lama, sida petara tu diau ba rumah panjai baka kitai mensia, ngambika banding baka rumah panjai Tansang Kenyalang ti alai Petara Aki Lang Sengalang Burung diau, pia mega Panggau Libau enggau Gelung Batu Nakung ti diuan sida Bunsu Antu baka sida Keling enggau Kumang. Sida idup baka kitai mensia – bumai, betupi, mindah, bejalai, ngayau, ngayap – semina sida iya lebih ari kitai ketegal sida ulih ngaga mayuh macham kereja ajih lalu tau mali diri nyadi utai tauka orang bukai.

Kitai Iban bisi ngembuan mayuh petara, lalu petara besai ti ngaga dunya enggau mensia pun iya suba, nitihka penemu lama ianya Kree Raja Petara ti dikumbai Raja Entala.

Kenu ko sida ti nyadi lemambang, kebuah kitai Iban nesa sampai tujuh aja laban Petara ke endang dikarapka Iban bisi tujuh iku. Sida tu diri menyadi, sida tu anak Raja Jembu duduk di batu tinggi didinggai, Meta raja pengibai, lalu sida tu ucu Raja Durong bejuluk lumpung tibang bebaring, Durong tuai be-rumah di tatai belakang tinting. Sida iya tu:

Biduk Linggar natar di senggal gumbang besabung, Aki Jugu Menaul Tuntung, Aki Lang Sengalang Burung. (God of War)

Manang Langgung ngembuan puchung penyangga nyawa. Matai Tuai Raja Menjaya. – Pengudah iya bebangun nyadi manang, iya dikumbai Menjaya Manang (God of Medicine)

Rangka Kirai Raja Sua, pepat pudah Raja Simpulang Gana. (God of Land)

Raja Biku Bunsu Petara, Pantan Inan Raja Jadia, Apai Maga Raja Lama pun Menua. (God of Resources)

Raja Selempandai tau begulaika tanah perai nyadi kerigai anak mensia, Raja Selempeta tau nempa teruba iya, Raja Selempetuh tau ngambuh tubuh mula ada. (God of Creator)

Ini Inda rabung menua, Ini Inee rabung hari, Ini Andan bepala bebunga jirak, kulit rapih betubuh biak, baka dara biak ke disuak digung bujang. (God of Justice)

Anda Mara, Gangga Gunggung penatai jalai raja, Gangga Ganggai penatai jalai kaya. (God of Wealth)

Sida menyadi tu mih petara ti selalu dikangau ka mensia dalam sampi, lalu petara ti diambi ngabang nya enda sama nitihka tuju sesebengkah pengawa diatur. Ambika chunto:

Maya Gawai Burung kitai ngangauka Sengalang Burung.

Maya Gawai Tuah kitai ngagauka Anda Mara.

Maya belian, manang ngagau sereta minta tulung Menjaya Manang.

Maya Gawai ngemali umai, petara ti dikangauka iyanya Simpulang Gana.

 

 

***Telai Pengarang: Laban ke ruai tu baru dituat, din ditu agi kurang. Ila aku nampung baru pasal kenang Petara Iban lalu nusui ka jerita sida siku-siku. Kitu-kitu mih selalu, “follow” tauka “subscribe” blog tu (kair ka ba “Aku nyukung Nuan”) ngambika bala nemu dia maya kenang tu bisi nambah seleka-dua. 🙂

Biau

Biau tu jaku terima kasih ngagai Petara, jaku minta pemujur enggau utai ti manah sereta jaku tabi enggau basa dikena nyambut pengabang tauka pemesai. Bisi maya Biau mega disempulangka enggau piring (Enti bisi ngundan leka sampi, lalu tu deka dikenang ba penudi pejurai Biau tu lagi) tang suah agi ke enda. Baka Sampi mega, orang ka miau semina siku aja ba siti-siti serak pengawa, lalu iya meseti megai siku manuk lelaki ti menang pilih dikena bebiau.

Biau begunaka manuk, tang manuk enda meseti dibunuh, enti iya biau adat basa baka pegawa ngelalu ke penatai pengabang. Manuk disayat maya bebiau enti biau nya bisi ngundan sampi – Ngangau ka bala petara. Penerang ti silik entang guna manuk dalam sampi tau dipeda ba tibak karang Sampi ti udah kala dikenang aku dulu agi ari tu.

Leka Main Invokasyen- Sampi

https://ibanpedia.wordpress.com/category/main-asal-iban/leka-main-invokasyen/sampi/

Tuju bansa kitai Iban bebiau nya bisi tiga. Keterubah iya dikena merekat ka utai tauka orang, baka ti merekat ka orang ti belaki-bebini, meri terima kasih, tabi puji enggau ngenataika pengaga ati ngagai Petara (Disempulangka enggau piring enti Biau nya bisi ngundan Leka Sampi minta tulung ari Petara). Ambi ka chunto, Biau Makai Selamat. Kedua nya dikena ngajihka pemanah, pengelantang enggau pemujur tau nyadi, Ambika chunto, Biau Gawai Dayak (Desempulangka enggau Piring). Tuju Biau ti penudi nya dikena muai penyalah, penusah, mimpi enggau burung ti jai lebuh temuai tauka pengabang bisi datai ngulu pengerami ti bisi di-intu kitai, lalu ngelaluka penatai sida, nabi, masa sereta nyambut penatai pemesai tauka pengabang ngagai sebengkah-sebengkah pengerami tauka Gawai,  Ambika chunto, Biau Ngelaluka Pengabang.

Semua utai ti enda manah nya tadi lalu dipanggai ka kitai ba manuk ti enggau bebiau. Udah nya manuk lalu dibunuh lalu semengat ia diasuh kitai madah ka pesan enggau sampi kitai ngagai bala Petara enggau bala aki-ini kitai ti lama udah nadai. Udah temuai tauka pengabang dibiau kitai, sida iya nyadi orang ti beresi lalu kitai ti empu gawai pan enda ditinggang burung tauka mimpi ti jai ti bisi mangka sida tadi.

Biau mega tau bisi ngundan Sampi (Prayer – peminta ngagai Petara) enggau Denjang (Blessing – minta berekat) kelimpah ari ke dikena muai utai ka enda manah. Tang Denjang enggau Sampi tu disebut ba ujung leka biau.

Ngambika chunto dalam leka Biau Pengabang ti bisi diselitka aku ba baruh tu , dulu lemambang meri tabi basa lalu ngelaluka penatai bala pengabang. Iya dulu miau muai burung enggau mimpi ti enda manah. Udah nya baru sida iya meri puji ngagai bala pengabang. Ditangkan ka lemambang nyampi ngagai Petara awak ka pengawa mujur lalu pengujung iya, leka biau merekat bala pengabang enggau orang ka bempu pengawa. Reti nya, biau tu tau ngundan mayuh leka main bukai, nitih ka pengelandik orang ke Bebiau.

 BIAU DIKENA NYAMBUT PENGABANG DITANAH:

Sa dua tiga empat lima enam tuuuuujoh!
Nya alai aku ke bediri kaya-kaya,
Megai selanjau ijau manok banda,
Ukai laban aku bangat galak lain baka.
Aku tu nunda adat lama kitai ke ari kalia selama iya.
Aku tu meri kita tabi, kedua iya adat basa,
Meda kita ke betuboh mua pemaioh betunga mua.
Kita tu endang datai ngena timpuh abis semaia;
Nadai alai kitai ngintai ka mimpi tinduk lina,
Nadai alai kitai ngintai ka igau diau di menoa.

Ba tibak keterubah di atas, lemambang dulu meri “ Tabi Basa” lalu ngelaluka penatai bala pengabang.

Nyangka kita bisi kena sipat mimpi ringat,
Kena pansa mimpi bisa,
Leboh kita ke nepan bas niki kereta,
Sepamanjai jalai sebelah menoa.
Nyangka kita ke bisi laboh pimpin,
Ke bemain ba jalai raya, Nyangka kita bisi raup ke ngelikup mansa mua.
Enti udah kena biau enggau selanjau ijau manok banda,
Nadai iya apa agi ko Petara,
Gerai nyamai ko Raja Selampandai.
Nyangka kita bisi salah igau nyandau malam,
Bisi igau irau begawan,
Nyangka bisi sipat mimpi ringat kena pansa mimpi rawan,
Nyangka leboh kita ke nait bas niki mantuka,
Enggau di semanjai jalai sebelah utan,
Nyangka kita bisi salah pimpin ke bemain sabelah jalan,
Nyangka kita ke bisi labuh raup ke ngelikup kiba-kanan

Ba tibak kedua ba atas tu, sepengudah lemambang ngelaluka penatai pengabang, dia iya lalu miau muai burung jai.

Enti kita udah dibiau aku enggau selanjau ijau manok jelayan tu,                    Tabar iya laar buai ka bukai,
Nya alai ke tu lengka ka aku dulu jako nya.                                                                 Lebuh ngambat pengabang, piring mega bisi dibai orang nurun.

Lalu ba tiba ti penudi dalam leka biau ba atas tu nguan Sampi, minta Petara merekat k pengawa sida.

Ripih Adat Nguan Anak

Bejalai betungkatka adat, tinduk bepanggalka pengingat. Nya siti ari pemayuh jaku rambai kitai Iban ti ngenang pengelikun sereta penyiru kitai bansa ti bepegai ba adat enggau basa. Kitai betungkatka adat bepun ari kandung indai…. nyentuka lesi bebadi laya sulai…Ari indai ngandung, nyera dataika anak bujang dara.

  • NGANDUNG ENGGAU NYERA

Terubah indu nemu diri deka betubuh bisi tauka ngandung nya lebuh iya ngasaka diri badu datai kain. Ba bulan siti ti nangkanka nya, enti iya nadai ga datai kain nya baru iya tentu nemu diri ngandung. Iya pan lalu belabuh ngitung bulan diri ngandung ari bulan keterubah iya nadai agi datai kain tadi. Pia mega sereta kandung udah lega, indu pan lalu berasai nyera. Lebuh indu nyera iya tetenguk ka mayuh macam utai dempa lebih agi baka buah masam.

  • BEPENTI

Nyadi lebuh kandung iya udah datat ba tujuh bulan nya baru indu nya enggau laki iya berengkah ga bepenti. Seduai iya mali ngetas randau atas ai tauka atas jalai enggaika indu kelalu begetah lebuh iya beranak. Seduai iya mali nekat ai, mali ngarut, mali nampunka bubu, mali mantangka paku lawang enggaika indu mar beranak. Indu mali ngelilihka minyak ngagai tapa lalu kena ngeminyak pala enggaika anak tuli. Seduai mali ngentakka ulu duku enggaika anak bengal. Seduai mali natuk telu manuk enggaika anak buta. Seduai mali nanam pisang enggaika pala anak besai. Seduai enda tau munuh jelu, burung tauka ular enggaika anak menawa sereta enggau deka bedarah idung. Seduai iya mali ngikis tacu enggaika anak enda tumbuh buk. Seduai mali bilik tama orang bisi nupi lelabi enggaika anak ngeram enda ada. Seduai iya mali narum enggaika anak ada celum. Enti indu nya bejalai ka bukai, nya jalai iya mansang nya ga jalai iya pulai enggaika anak tesut jalai ada. Seduai iya mali makai utai dalam kibung enggaika beranak mengkang. Seduai iya mali ngema batu enggaika anak tungkut. Seduai iya mali megaibangkai enggai ka anak menawa luput. Udah anak ada tang indal agi bisi getah dia apai iya mali nyilup tuduh enggau mali nekat ai. Sereta indu udah beranak penti pemali bukai enda mali dikereja agi ketungkah an pemali ti besai agi ngagai maya anak mit nyau tau maut kaki diri nya baru penti pemali abis.

  • BERANAK

Pengelama indu ngandung semilan bulan semilan ari. Sereta anak nya ada, orang ti ngulu kia ka lalu nuntungka papung tengkiung, tang kamaya tu nyau ditimbakka senapang. Kebuah iya pia laban ngambika anak nya beseregah lalu nyabak. Udah anak ditetak tali tampok tauka temuni (antu muni), iya lalu diberi mandi, udah nya lalu dibedung. Udah tembu medung iya, nya baru iya digalika lalu dikujuk ngena pua kumbu.

Lebuh orang ngintu anak mit dia indu bukai ka endang masal ngintu orang beranak pan lalu maut perut indal iya. Udah sida tembu bepaut, nya baru tubuh iya serap diunsut sida enggau lia, udah nya baru malut enggau balut tekalung.

  • BEKINDU

Udah iya tembu balut nya baru orang nudukka iya bekindu. Sereta baru duduk, iya lalu disapi enggau asi tiga suap. Sekumbang iya ka bekindu, utai dempa iya kena ngulai asi nya salai ikan, paku kubuk enggau buah pulur, tang semua lauk tu digulai enggau ai lia magang. Ai tauka lulun lia pan dempa iya mega ngambi ka tubuh iya angat.

Nyadi pengelama indu bekindu empat puluh satu malam. Nyadi jalai orang niap malam iya bekindu, tiang dicunting sida enggau kapu. Kebuah alai ngaga kelai ba tiang, laban kalia Iban nadai kelinda ari bulan. Nyadi kamaya tu laban semua orang nyau udah nemu nyurat magangnya baru sida ngitung malam ng ari bulan baka jalai bansa bukai. Nyadi unggun kena indu nya bekindu nitih ka menua endur iya diau. Enti indu di menua ulu, iya diasuh ngena unggun kayu malam, unggun manding tauka lensat.

  • NENGKADAH HARI ENGGAU NGETUP GARAM

Sereta tali tampuk udah tingkil kira empat lima ari udah anak mit nya ada, nya baru iya dibai ini iya tauka indu ka tuai agi umur dalam rumah nya pansut ke tanju ngambika iya engkadah ari. Lebuh engkadah ari dia anak mit nya lalu diculitka garam ba mulut. Udah nya baru disampi munyi tu:

“O hoi! Ni nuan Petara, ni nuan ini Inda rabung mendung, Ini Inee rabung ari. Ni nuan Serangindit ke ngaga langit ari buah embawang lanja, peda, tela, jaga, kemat ka ucu kami. Beri iya pemidik, beri iya pengelansik, asuh iya benama, awakka iya beberita diau di menua. Asuh iya gerai, asuh iya nyai asuh iya kaya, asuh iya raja. Gayu meh iya tu ku Sentuku, gerai ku Selampandai, nadai utai ngawa ku Petara.”

  • NGAGA NAMA ANAK

Nyadi kalia Iban enda beguai ngaga nama anak. Sekumbang anak nya agi mit iya dikumbai Ulat, enda milih lelaki tauka indu.

Lebuh apai indai ngagaka anak sida nama nitihka adat Iban kenyau ari kelia madah ngagai kaban apai indai enda aki ini bilik sepiak, awakka ngiga nama aki ini ke udah mati ka diangkatka nama anak Ulat tu. Nitihka adat Iban ngangkatka nama aki tauka ini ari apai tauka ari indai orang ka udah parai. Lebuh orang nyunggaka anak mit dia orang ke ngemata ka ricah bendar. Gendang taja enda tentu dipangkung bendar lebuh nya tang anembiak enti sida deka mangkung enda ditanga, ngambika bisi kena mampul pending awakka enda ninga burung manah tauka jai enti bisi bemunyi.

Udah anak nya diberi mandi, enti anak mit nya lelaki sayap manuk sepiak ditancang ngena benang mansau lalu dituat ka ba baur berayang. Enti iya indu laletan ga kena orang nuatka sayap manuk. Semak sayap manuk nya tadi di engkah ka orang piring siti atas kelingkang digantung orang ari pucuk buluh agi bedaun.

Tembu pengawa di ai, orang lalu pulai ke rumah. Sida ka pulai tu beripih baru baka ke mansang tadi lalu agi dilagu enggau gendang enggai ka ninga burung. Datai sida di rumah anak lalu dipangku indai iya dibai duduk atas setawak ba tengah ruai dibap ngena pua kumbu awakka ditatap enggau ai. Nyadi ai kena orang betatap nya ai batu penabar burung, ai ringgt, ai tincin mas engkah dalam pinggai besai.

Udah orang tembu natap anak seduai indai enggau ai pencelap nya baru orang lalu bempa ka penganan, tuak arak enggau macam pemakai bukai ka dikemisika sida. Udah tembu nya, nyau tengah ari nya baru orang lalu makai di ruai nya dikumbai makai diruaj meri anak mandi.

  • DIWA

Lebuh umur anak nya kurang lebih nyau manggai ba enam bulan, nya baru iya diwa aka tauka ini ti ngibun iya. Ba maya umur tu mega, indai iya empu nyau tau ninggalka iya gawa ke umai enggau ngagai endur bukai ke enda bengat jauh ari rumah. Kebuah iya enda tau turun jauh laban anak nya enda tau enda ditusuka iya. Lebuh aka tauka ini iya ngiia anak mit nya, leka wa sida manah bendar nitih ka penau sida berua. Sida ngayuka iya enti anak nya lelaki iya kering, jampat, regas, berani Iebuh maya ngayau mulau. Enti iya indu, sida ngayu ka iya pandai muntang, pandai nengkebang, landik ngikat landik ngebat ngaga pun laban nya endang rabung pengawa sida ke indu.

Sekumbang anak mit nya apin bisi adi, endang ka baka jalai Iban, iya agi tinduk begulai enggau apai indai. Nyadi enti iya udah ngadi nya baru tinduk enggau aki seduai ini.

  • MINCING LABU

Anak indu baru tau dikumbai mincing labu lebuh umur iya datai enam taun. Jaku tu dikena Iban bendar lebuh orang nanyaka maya umur anak iya.

Nyadi anak lelaki enti datai ba maya nya umur dikumbai baru sirat-leka, reti nya ama deka besirat ama agi ga deka telanjai, laban iya apin tentu nemu malu.

Tang deh ba maya nya umur anak indu enggau lelaki agi saum main. Sida nindu besulu diri sama diri nyabung dairn engkerajai, nyabung daun nan enggau nyabung daun bukau ha sebelah babas semak rumah tauka ditembawai.

  • SINTAL LEKA / MELIT LEKA

Baru nemu sintal leka reti nya anak indu nya kira baru umur baruh ari 6 taun lalu iya nguji ka diri masuk ka kain tang bedau tentu nemu nyintal ka kain lalu dileka ka iya. Anak lelaki pan bakanya mega, dikumbai orang baru nemu melit leka, retinya dibelitka sirat ngelinggi punggung ensepi enda nyadi lalu dileka ka iya ga. Baka nya mega maya anak lelaki ke baru tau ngambi kayu, umur iya kira 7 taun.

  • NGANGKATKA DIRI BUJANG ENGGAU DARA BIAK

Nyau datai ba umur sepuluh taun, nya baru anak indu belabuh tinduk kediri. Ari iya berengkah beserara tinduk ari apai indai iya lalu digagaka sida peninduk ti manah bendar kena mandang ka diri bisi anak dara. Agi kelia lebuh anak indu maya nya umur, enti iya anak orang ke tuai megai menua, iya diumbung di sadau dijaga kaban ulun sida ke indu. Pengelama iya diumbung bakanya nyentuk ka ari iya nurun belaki.

Nyadi anak lelaki ba maya nya umur, iya apin nyerara diri tinduk kadiri di ruai enti bujang bukai nadai tinduk semak ruai sida.

Endang adat Iban kenyau ari jeman dulu, enti anak nyau deka ngangkatka diri bujang, iya lalu diasuh apai iya besunat. Pengawa tu taja iya enda tau enda dikereja tiap iku anak Iban ke lelaki, iya okai pengawa di rami, tang dipelalai ka enggau bendar. Semua anak lelaki Iban enggai enda besunat, laban sida takut ka diri di kumbai orang kulup.

  • BELABUH BELAJAR GAWA

Nyadi anak indu enti umur iya udah manggai ba tujuh tauka delapan taun dia iya lalu mupuk diajar indai tauka ini iya berapi, nutuk enggau ngisar. Kebuah bakanya, ka satu, awakka iya jampat tau nulung sida sebilik gawa, enggau kadua beguai ka iya landik ngereja pengawa ti endang dikereja anak indu, kena iya ngidup ka diri empu ke dudi ari ila.

Nyadi anak lelaki ba maya nya umur baru belajar ngerangkang. Iya apin tau ngambi kayu, laban iya apin tekenaka kapak tauka beliung kena nebang, mungga enggau melah kayu. Pia mega an maya nya umur anak lelaki pen lalu belabuh nitih ka apai iya gawa ka babas. awakka iya meda ka gaya orang ngereja pengawa.

Nyadi anak indu entj umon iya nyau manggai tigabelas taun nya baru berengkah belajar nganyam. Utai dub dipelajar ka iya nya nganyam baka, nganyarn raga enggau nganyam utai bukai ti mudah dipadahka indai seduai ini iya.

Nyadi anak lelaki ba maya nya umur baru ngengkah ka cmi belajar ngena kapak tauka beliung, dikena ngambi kayu.

  • NGANGKATKA DIRI BUJANG ENGGAU DARA BENDAR

Lebuh umur anak lelaki nyau manggai empatbelas taun iya belabuh ngemujangka diri bendar. Lebuh nya apai indai iya ngajar iya jalai basa, jalai jaku siru, jaku manah enggau orang bukai. Pia mega ba mala tu umur anak lelaki baru nguji kadiri enggau bujang ka tuai agi ngayap. Nyadi laban ngayap tu endang uti hujang enggau dara bansa Iban, nya alai jaku di kena lelaki bebasaka indu Iebuh ngayap enda tau enda dipelajar ka sida bendar. Sida enda tau enda bebasa ka balai orang dara, bebasa ka orang ke tinduk nyangka orang bisi mimpi lalu naka ulih bejimat bejalai niti rumah orang. Nyadi enti sida jelar-jelar, ari penatai sida enggau jalai jaku sida, indu ke besai ati nemu lelaki nya anak orang ke kurang ajar. Indu enda rindu ka perangai lelaki baka nya.

Nyadi ari randau Iebuh ngayap mayuh bendar lelaki madahka diri deka bebini indu, tauka madahka diri kia ka endang ari asuh apai indai iya nanya indu nya ka bini. Lebuh ninga jaku tu indu enda tau enda berunding bendar. Kada ka jaku nya amat, kada enda semina deka ngulihka tubuh iya aja. Nya alai banya indu mayuh bendar meh penguji. Sida madahka diri apin deka belaki enti lelaki nya apin ngayan ka tanda iya anak lelaki. Baka tu tanda nya amat anak lelaki. Iya puas udah berambun ka nyawa pegi ka menua bukai ngiga nama ngiga reta. Agi mega lebuh munsuh agi mayuh kalia suah bendar orang ke dara ngumbai diri enda belaki ngapa enti tapa jari lelaki nya apin dicerengga enggau darah tau ka apin di tegulun. Laban peransang orang ka indu munyi nya, nya kebuah lelaki Iban kalia jarang enda pegi, jarang enda enggau ngayau, laban takutka diri pedis bulih induka bini. LeIaki ti enda mindah ari rumah rambau orang ka tuai kalia, nya ka dikumbai orang buyan lalu tau masok ke kain indu. Sida nya mar bendar tulih ka indu ke belinsar begamal ka bini.

Nambahka nya lebuh anak indu nyau ngangkatka diri dara bendar, enti bisi lelaki nanya iya ka bini, iya nyau tau diatur apai indai iya belaki. Umur anak dara Iban suah diatur belaki lebuh iya manggai bendar tujuh belas taun. Lebuh anak indu nya ngenaraka diri, dia inda iya lalu ngajar iya semua jalai nyaga tubuh diri dara. Iya diajar enda tau enda nemu ngaduka jalai basa enggau jaku kena berandau enggau anak lelaki ti ngayap ngagai iya. Iya endang nemu mega endang adat anak lelaki ngayap. Tang bulih enggau enda tubuh iya, nya atas ati indu empu, laban lelaki ti datai ba tikai balai iya enda tau bulih kediri enti ati indu enggau lelaki enda sama deka ka pangan nitihka pemanah budi enggau kelakar anak lelaki. Indai iya ngajar iya utai tu belalai bendar, lalu enggau naka ulih iya madah ka reti lelaki ke deka nipu enggau iya ti mai ati bendar deka bebini.

Sampi (Leka Main Invokasyen)

Sampi tu jaku pengarap asal bansa Iban ti dikena bepintaka berekat sereta tulung ari Petara, bunsu-bunsu antu ti manah, tuai-tuai Iban ke tebangkar ti udah nadai, semengat aki-ini, apai indai, kaban belayan ti udah lesi bebadi laya sulai. Semua sida tu dikangauka datai ngambika makai semua rengka piring ti udah diading enggau pengarap sida tu udahnya malas piring nya ngena tulung tauka pengaruh.

Kelimpah ari pengarap, sampi tu mega adat, leka main asal enggau daya idup kitai bansa sebedau datai pengarap baru baka Kristian, Islam enggau pengarap-pengarap ti bukai. Tu mih kebuah leka sampai ari kelia enda berubah, datai ka saritu.Sampi bebida ari biau laban leka biau tu sepeneka matau nitihka pengelandik kitai siku-siku lalu tau mega berubah nitihka singkang sereta insur pemansang dunya.

Orang ke nyampi tu siku aja ba siti serak pengawa, enda beraban baka nimang (Timang) tauka mengap (Pengap). Enda baka lemambang timang ti meseti lelaki, lemambang sampi tau lelaki sekalika indu sereta enda milih penuai umur. Kelimpah ari lemambang, pengawa nyampi tu mega tau dikereja sebarang orang ti nemu megai piring, asal iya manah pengingat, landik bejaku, landik bemain enggau leka sereta bungai jaku. Leka sampi ti dikembuan iya endang ulih iya belajar ari lemambang ti tebangkar tauka ulih ari kenyap iya empu.

Baka niang lemambang Lindong ari Saratok ambika banding, ketebal agi orang ti landik besampi tu endang sida ti nyadi lemambang timang ti landik mega dalam leka main asal ti bukai baka jaku tuai dikena maya pengawa malah pinang, tusut, renung enggau pelandai. Iya mega landik pasal pengawa turun piring enggau ripih gawai tauka pengawa ti disampika iya. Kitai Iban nyampi laban bisi niat di ati tauka bisi utai ti deka dipinta ari petara enggau bunsu-bunsu antu ti manah. Kelimpah ari nya, tuju Iban ti nyampi mega dikena muai utai jai, ngabau ngerumbau, ngenabar ngelar burung tauka mimpi ti enda manah. Ambika chunto, enti bisi burung jai tauka enda manah, pengawa nyampi deka dulu dikereja apin ka pengawa “makai burung jai” dikereja orang ti tau makai burung.

Apin pengawa nyampi berengkah, orang ka empu pengawa meseti nyediaka piring ading. Rengka piring ti genap meseti bisi ngembuan pinang, sirih, sedi, kapu, daun ruku, semakau, asi amat, garam, sungki, ketupat, asi pulut ruas, telu manuk, penganan tauka tumpi, rendai (letup), tuak tauka arak, buah engkudu, pisang enggau beras kuning (jarang dikena). Manuk pemiau meseti bisi siku, lalu manuk pemiau tu meseti ka manuk lelaki, enda tau manuk indu. Manuk lelaki meseti udah tumbuh tada lalu tan pilih, reti iya ngena bulu tauka chura manuk.

Sebedau nyampi, lemambang sampi deka dulu ngetup besi ka pengering semengat. Udah nya iya berunsut ngena ubat enda busung (Enggaika bisi mansa nama bala entua tauka nama bala ti enda tau disebut nitihka tusut). Lemambang sampi mega deka berunsut enggau ubat enda layu tauka ngerabun ngambika enda alah ayu ti tau ngejungka iya empu sakit ketegal ti enda tan bulu kena bandung utai tauka mensia ti disampika iya.

Lebuh nyampi, lemambang sampi bediri megai manuk nungaka adap matahari tumbuh enggaika kena tinggang kemayang (kelemayang) diri ti tau ngujungka iya empu alah ayu. Lemambang nyampi nitihka ripih tauka rurun. Pun leka sampi tau belabuh ngena “O…ha! O…ha! O…ha!” tauka “Sa, Dua, Tiga, Empat, Lima, Enam, Tu…juh!” nitihka pemesai pengawa ti disampika iya sereta penyampau turun piring. Pengawa sampi ti besai agi selalu iya disempulangka enggau piring ading turun tujuh tauka sembilan lalu kena ngepunka pengawa nyampinya, lemambang deka belabun ngena “O..ha” tiga kali, udahnya baru ditampungka enggau tesa Sa ngagai Tujuh. Lalu enti pengawa sampi nya mit agi, piring selalu iya turun tiga tauka lima, lalu lemambang enda tau ngepunka sampi ngena “O..ha!” tiga kali, tang terus belabuh nyampi ngena tesa Sa ngagai Tujuh.

Kenu ko sida ti nyadi lemambang, kebuah kitai Iban nesa sampai tujuh aja laban Petara ke endang dikarapka Iban bisi tujuh iku. Sida tu diri menyadi, sida tu anak Raja Jembu duduk di batu tinggi didinggai, Meta raja pengibai,lalu sida tu ucu Raja Durung bejuluk lumpung tibang bebaring, Durong tuai be-rumah di tatai belakang tinting. Sida iya tu:

Biduk Linggar natar di senggal gumbang besabung, Aki Jugu Menaul Tuntung, Aki Lang Sengalang Burung.

Manang Langgung ngembuan puchung penyangga nyawa. Matai Tuai Raja Menjaya.

Rangka Kirai Raja Sua, pepat pudah Raja Simpulang Gana.

Raja Biku Bunsu Petara, Pantan Inan Raja Jadia, Apai Maga Raja Lama pun Menua.

Raja Selempandai tau begulaika tanah perai nyadi kerigai anak mensia, Raja Selempeta tau nempa teruba iya, Raja Selempetuh tau ngambuh tubuh mula ada.

Ini Inda rabung menua, Ini Inee rabung hari, Ini Andan bepala bebunga jirak, kulit rapih betubuh biak, baka dara biak ke disuak digung bujang.

Anda Mara, Gangga Gunggung penatai jalai raja, Gangga Ganggai penatai jalai kaya.

Udah ngesuhka pemuka sampi, lemambang sampi nyebut diri enda tulah enda busung enti sema bisi tesebutka nama entua tauka nama bala ti mali disebut nitih tusut laban iya udah berunsutka pengaruh enda busung enggau beketupka besi pengering semengat. Iya mega madahka diri enda busung, enda lunggung laban iya niti nali pengawa orang ke tuai ti udah parai lesi bebadi laya sulai, ukai muntang ukai nengkebang.

Lemambang sampi dulu ngerintaika karung rumah enggau keresa ti di rumah enti iya nyampi dalam rumah. Enti iya nyampi di tanah umai,iya dulu ngerintaika karung tegalan enggau utai di tanah. Lalu enti iya nyampi ba ai, iya dulu ngerintaika bala sida Seregindi ti dulu ngaga ai bepati mayuh nanga. Udah nya, iya lalu ngerintaika karung semua rengka piring ading sereta ngasuh sida nya ngambi petara enggau bunsu-bunsu antu ngabang ngagai gawai tauka pengawa ti dibela. Semua Bunsu Piring madahka diri enda tau ngambi Petara ngabang laban pengawa sida semina nyambut pengabang enggau ngibun pengkalan anak mensia.

Lemambang sampi serebana ngeluluka gawai tauka pengawa enda nyadi laban nadai orang ke tau dikandalka ngambi  Petara ngabang. Lalu nitihka penemu sida lemambang, Bunsu Piring udahnya lalu madahka Bunsu Manuk tau diasuh anak mensia ngambi Petara ngabang. Taja bakanya, bisi gak anak mensia enda setuju ka Bunsu Manuk ngambi Petara ngabang laban kenu ko sida,

“ Enti manuk, dini tau ngambi Petara ngabang. Iya ga jai, diau malai kemi, tinduk malai tai. Gali garing-garing, kemi peneka manching, bira peneka nungging. Merau nadai berangai, duduk enda betikai, berumah semuti bekalai. Beranak ada telu, makai enda bebasu, bira enda besengkilu.”

Pengawalalu bisi tejanggal baru laban nadai orang nemu madahka Bunsu Manuk di menua iya di Munggu Wi Seru, dudi dibatak dulu bekelidak nyadi sana, Rantau Madang Sibau, dudi ditelan dulu masam tama nyawa. Meda baka nya, Bunsu Nyeli seduai Bunsu Seku lalu nyanggup diasuh anak mensia madahka Bunsu Manuk.

Ninga anak mensia nginjau iya ngambi Petara ngabang, Bunsu Manuk dulu minta pemendar ari apai seduai indai iya. Apai enggau indai Bunsu Manuk sigi enda nagang ngenang pemanah anak mensia laban sida manuk ulih idup ketegal ditengkani anak mensia, puni ai ulih nyauk, nyingkau berau ulih nutuk. Bunsu Manuk lalu begari, “Kaki ungki enggau rabi ubung benang. Pala tata enggau lala minyak kepayang. Patuk rasuk bentuk tinchin tumpang. Belanggai mih manuk Tawai ka gansai mata ilang.  Beiku mih manuk Kelabu ka duku perapang pedang. Besayap mih Ijau kepiat ke menyeti bali tengkebang.” Udahnya indai iya lalu nerebaika Bunsu Manuk nuju menua Petara enggau Bunsu Antu ke diambi anak mensia nyadi tuai pengabang dalam sebengkah-sebengkahgawai tauka penga ti diintu kitai Iban.

Lebuh ngambi Petara ngabang, Bunsu Manuk terebai neresa mayuh menua sereta madahka mayuh bendar Petara enggau bunsu antu ke diau di tanah, di puchuk kayu, dalam ai enggau atas langit. Sekeda Petara ka diau di tanah nya baka sida Simpulang Gana, Selempandai, enggau Bunsu Antu ari Panggau Libau enggau Gelung Batu Nakung. Bunsu antu ka diau ba puchuk kayu nya baka sida  Ketupung, Beragai, Bejampung, Pangkas, Embuas, Papau enggau Nendak. Petara enggau bunsu antu ka diau ba ai nya baka sida Seregindi ti dulu ngaga ai bepati mayuh nanga, bala sida Bunsu Ikan, Bunsu Teekuyung, Bunsu Lelabi, Bunsu Gerama enggau Bunsu Baya. Petara enggau Bunsu ka diau ba langit nya baka sida Aki Lang Sengalang Burung, Ini Andan, Bunsu Bintang Banyak, Bunsu Bintang Tiga, Bunsu Bintang Tujuh, Bunsu Bulan, Bunsu Guntur enggau ti bukai.

Petara enggau bunsu-bunsu antu ke ngabang sama bela ninggalka pengaruh dikena sida malas piring ading ti udah digagaka sida.  Sida dulu nyumpah enggau ludah sebedau sida siku-siku pulai ngagai menua diri empu.

Sekeda ari sampi ka suah dikena bansa kitai Iban nya baka Sampi Gawai Burung tauka Gawai Kelingkang, Sampi Nampuk Gawai Sakit, Sampi Nampuk Ngiga Pengaruh, Sampi Meri Anak Mandi, Sampi Manang, Sampi Besampi, Sampi Ngemali Umai, Sampi Ngetas Ulit, Sampi Gawai Benih, Sampi Nugal, Sampi Mudah enggau Sampi Gawai Sandau Hari tauka Pandung ke Tanju.

Telai Pengarang: Udah tu ila kitai ngenang bansa sampi siti-siti, nganti tudah pangan bisi ari lepa mimit. Tuat ruai gak baru dientak, sigi din ditu mih utai nadai. Tang anang mih kita ta ringat lalu ngerijat, kitu-kitu mih selalu, ngabas ruai tudah kaban nyangka ka bisi nambah lansa kenang seleka-dua. 🙂

Sabak (Song of the Death)

Sabak tu leka main ti diserenggutka dikena ngintu pemati, tauka lebuh nyenggai orang ke parai. Sabak diserenggutka sebedau bangkai dikubur, iyanya sebedau makai pana tauka sebulan udah niang ninggal maya udah tembu timpuh ngulit. Sabak Bebuah tauka Sabak Bangkai diserenggutka sebedau bangkai ditepu dalam rarung lalu pengudah pulai ari pendam, Lemambang Sabak tauka Tukang Sabang nyabak baru lalu sabak tu dikumbai Sabak Pana ti dikena nganjung asi ke sebayan.

Tukuh Sabak bepanggai ba tuju enggau konteks. Ambika chunto Sabak Sedan tauka Sabak Ngerais tauka Sabak Rempah (Rejang) tauka Sabak Sebana (Saribas) disempulangka enggau sabak ke bendar, iyanya duie-duie enggau berempah. Sabak Tina (Rejang) diserenggutka udah tembu timpuh ngulit, tuju iya dikena madahka niang nya ending iya amat parai, tina iya chelum ti dipinka babaju tauka ditanchangka ba punggung tanda orang ngulit. Sabak Kenang (Sri Aman) diserenggutka maya Gawai Antu, tuju iya nusui ka pengidup orang ti parai nya kena masa iya, lemambang sabak berayun ba Wa (Ayun), lalu bisi orang semak wa dia nulung iya ngingatka pemanah enggau pengawa niang ngambika ulih dilaguka lemambang Sabak.

Orang ti mati deka disabak ke alai lemambang sabak ngeluluka semengat orang mati ninggalka tubuh iya lalu belabuh bejalai nengah mayuh bengkah menua burung, jelu, antu enggau utai bukai nyentukka iya datai ba menua Sebayan din. Bisi Sabak ti dikumbai kitai Iban Sabak Lumbung diserenggutka dikena ngagauka semengat orang ti udah parai nya nemuai ngagai sida ti agi idup, ngicaka iya mai pengaruh enggau ubat-patat. Sabak Lumbung tu disambung enggau Timang Jalung ka pengingat tudah niang ngicaka tau mai ubat-patat ari sebayan maya orang berantuka iya (Gawai Antu),

Siti adat asal enggau pengarap lama ti ngasuh bansa kitai jauh nyelai ari bansa bukai nya pengawa kitai ke ngembuan adat enggau main asal kena ngangau pulai ka menua (rumah panjai asal) semengat orang ke udah mati nya ari Sebayan. Jalai kangau tu ngena main asal ke dikumbai kitai Timang Jalung, lalu dikereja sereta ambika batang pengawa lebuh ngintu Gawai Antu.

Lebuh Gawai Antu lemambang ngeluluka semengat bala orang ke udah mati nya angkat ari menua Sebayan, iya nya Batang Mandai, ngena timang ti dikumbai kitai Iban Timang Jalung. Jalai semengat bala Sebayan nya pulai ka menua lama sida nya sama beripih ka pun baru baka ripih tengah semengat sida baru mati mansang ngagai Batang Mandai dulu suba.

Nya alai reti nya, leka Sabak enggau Timang Jalung tu ngeripih dua iti jalai semengat kitai mensia mansang ngagai enggau pulai nemuai ari menua Sebayan.

Sabak ngeripih jalai ari Dunya nuju ka Sebayan,

Timang Jalung ngeripih jalai ari Sebayan pulai ka Dunya.

Lebuh siku mensia nya parai, iya lalu disenggai. Ditu meh lemambang tauka tukang sabak nya ngeluluka diri nganjung semengat orang ke udah parai ngagai menua Sebayan di Batang Mandai. Lemambang Sabak duduk semak sapat, duduk ba lantai tauka ba wa lalu berayun (Sabak Kenang), jari iya sepiak kiba megai perecha dikena nutup mua, lalu jari kanan iya megai kaki bakih iya ti semak. Kaki Lemambang Sabak dipanggaika iya ba papung besi dikena ngeringka semengat.

Dalam leka sabak, lemambang sabak terubah ngeluluka diri deka ngemai orang ke dikangau iya nya tadi sama enggau nganjung semengat orang ti parai disabakka iya nya. Udah nya iya ngelulu nanya orang ke parai meda iya tak nyelai gamal. Mayuh ga genteran sabak iya ditu ke kadang bisi ga ngasuh sinu ati. Baka iya ti ngerara lapa niang te lama bendar tinduk, iya mega madahka pemanah bilik tinduk tang niang enda ulih angkat, megai tauka meda sereta ngasaika pemanah utai agi. Udah bekau nya lemambang sabak lalu ngerara kebung langit, lalu serabana tusah ditinggal orang ke parai.

Tembu kenang nya, lemambang lalu ngerara kesulai burak tauka burung ti dibai Bunsu Ribut, iya nya tanda bala ari Sebayan datai. Ditu lemambang lalu madah ka orang ke parai nya bala Sebayan ke bisi datai sereta lalu ngeluluka sida nya udah manggai ba pendai orang ke mati, leka sabak iya munyi tu “Nyau manggai meh bala raja sida Niram, Raja Sebayan di pendai renjan, Orang ke datai ari Limban dalam begenenang.”

Udah nya, ku lemambang sabak nya, bala Sebayan lalu niki ka rumah lalu dibiau enggau manuk. Iya ngeluluka orang ke mati nya enggai enggau Sebayan laban sinu ninggal bala iya ba menua, tang nyau kelama baru deka nitih. Lemambang sabak lalu ngelulu ka orang mati nya minta baya enggau chukup.

Sebayan pan lalu mupuk nurun mai orang ke mati nya pulai ka Mandai. Betuaika Raja Niram Tuai Sebayan, sida lalu niti jalai pendai, udah nya lalu mansa tembawai lama negah jalai ti kala udah ditujah niang lebuh iya agi idup menya. Udah nya sida lalu mansa temuda agi jerami, lalu mansa menua Bunsu Ketupung Buban, menua Burung Beragai, udah nya menua Bekubu Banda Bulu Burung Ketupung, menua Bunsu Kedampi, enggau menua Bunsu Buau. Datai ditu baru iya ke mati nya nemu diri parai. Ku iya, “lesi meh aku tu bebadi laya tetumpat, pia ku jaku aki bujang sigat. Nama aku tu nyau melakang ka gentilang remang rarat, nyau berindik di madang rumput gamat,baka kempat guntin bujang.”

Lemambang lalu ngelulu ka sida mansa langkau alai orang beburung. Udah nya lalu mansa menua Indu Antu, udah nya mansa menua anak mati lulus. Sida lalu mansa jalai Anda Mara enggau jalai Simpulang Gana. Udah nya bala sida lalu mansa jalai Manang Nyara Ke belian ka bedega nyarang takang. Sebayan pan lalu datai ba jalai rurus ka menua Batang Mandai Mati. Sepengudah nya sida lalu mansa menua Bunsu Dundun Berani Ke tau betenun ninting hari ninting pagi, orang betenun enda berenti semadi putus tali lumbai pemuntang. Udah nya sida lalu mansa menua Bunsu Semalau Mukau, udah nya menua Bunsu Burung Tiup Api.

Udah nya baru sida lalu mansa menua Bunsu Bubut ti diau semak Andau tauka Batang Titi Rawan. Nyadi kenu ko jerita, enti niang orang ti berani, nyamai iya niti Batang Titi Rawan, lalu enti iya takut, dia dih titi nya bebali nyadi mit lalu begilik ti tau ngasuh niang rawan nangika diri labuh ke lebak alai Ai tauka Sungai Limban.

Lemambang sabak nyebut iya munyi tu, “Nya ga Bunsu Bubut Dara ke ngemata ka nanga jalai midang.”  Nyadi ba pengarap lama kitai Iban enti selalu ninga bubut memunyi, nya munyi ke sinu laban bubut nya nyabak ngetanka semengat orang ke parai. Nya alai ku kelulu lemambang sabak dalam leka sabak iya, “Oh anang meh nuan enggau orang midang laya sulai deh aki bujang besai, pia ku jaku Bunsu Bubut Tuai. Aku deka merindang nuan enggau pelulin tinchin mas urai, nyangka ukur semengat nuan agi ulih tangkap Rechap manang tuai.”

Nyadi kenu ku jerita, enti semengat orang ti parai nya singgah ngetu ba rumah Bunsu Bubut, dia dih iya tau angkat idup baru. Tang ke selalu iya, semengat orang ti udah parai enggai ngetu dinanka Bunsu Bubut laban meda gamal iya chelum ngelintum sereta jai, pia mega penalan rumai ti alai iya diau. Udah nya bala Sebayan pan lalu datai ba Titi Rawan ke dipangkang Endu Dara Tuyu, ke bejaku tau bejeratan, dipangkang Kumang tukang nyabak nyedan, nya ga Bunsu Bubut Buban orang ke ngibun Titi Rawan.

Angkat ari nya, sepengudah niang mansa Andau Titi Rawan, sida bejalai lalu datai ba Pintu Tanah ti digaga ari batu ti semina ulih dibuka Kumang Belut tauka kedua bali nama iya Dara Rambai Geruda. Udah tama ke sebayan nengah Pintu Tanah, sida lalu datai ba menua Sang Jura tauka Ensing Jara, iyanya menua alai orang nyabung manuk. Udah nya sida lalu datai ba tebing Sungai Mandai lalu dibai nepan Berangai (Perau) ti baka larung ti dibap enggau pua kumbu ti beatapka batang sumpit, enti niang nya bujang berani, atap perau nya beatapka tulang munsuh. Berangai sida mudik ke ili Sungai Mandai.  Sepemanjai sida ke mudik ke ili, sida bisi mansa menua Burung Raya, iya nya burung ke nganjung asi pana ari menua tu ka Sebayan. Udah nya mansa menua Raja Sera Ganti, menua Raja Selampandai, menua Burung Kuang Kebat, menua Bunsu Remaung, menua Raja Siba Iba, iya nya Bunsu Antu ke tau meda menua tu enggau menua Sebayan. Angkat ari nya mayuh mega bengkah menua antu, menua burung enggau jelu, sereta utai bukai ke kena pansa sida apin perau sida sangkai ba Pengkalan Ai Mandai ke alai sida mandi.

Udah bala Sebayan mandi, lemambang sabak lalu ngeluluka sida mupuk bedarat ari pengkalan nya tadi ngagai rumah sida. Lebuh ke bedarat nya bala sida mega mansa sekeda menua antu, menua petara nyengkaum menua Indai Bilai Tusu Lanjut Panjai Lempai ka belakang. Ka pengabis iya bala sida lalu datai di rumah, ba bilik penaik di Sebayan alai iya meda Pun Ranyai tauka Nibung Ranyai tauka Ensurai Ranjing ti penuh buah pengaruh ti semina ulih diambi orang ti tau kayau enggau landik nenun. Tu ti diambi iya lalu disimpan, ngambika bisi dibai iya ngabas bala iya di menua ti agi idup lebuh maya orang berantuka iya maya Gawai Antu.

Ranyai ti dikenang aku ba atas nya dikena orang merindang semengat niang ti baru datai ba sebayan. Sepengudah lemambang sabak meda niang rindang, dia iya madahka Dara Rambai Geruda iya ka pulai. Semengat iya lalu ditabanka Bunsu Ribut pulaika menua orang ti agi idup.

Ngena peluang tu mega aku ka ngelansa mimit pasal semengat niang ti pulai ke menua asal iya ari sebayan maya orang ti merantu iya ngambika kitai tau meda kait pengawa Sampi enggau pengawa Timang ti bisi udah ditulis aku dulu ari tu tadi. Nyadi lebuh orang nirika Gawai Antu, semengat orang ke udah parai nya dikeluluka lemambang ke Nimang Jalung pulai angkat ari Sebayan ngabas menua lama, iya nya nikal ngagai rumah panjai alai iya parai dulu menya laban bala peturun iya begawai merantu iya.

Menua dipansa semengat orang nya angkat ari Batang Mandai (Sebayan) pulai ngagai menua lama iya, nitihka kelulu lemambang timang jalung nya sebaka enggau menua ke dipansa iya mansang dulu lebuh baru parai. Leka ke bebatang dalam timang jalung nya bala ari Sebayan begau, udah nya lalu bebai nurun ngabang. Lebuh udah nurun ngabang, sida lalu datai ba menua Indai Bilai, Manang Nyara, Indu Mati beranak, Orang Mati Pandak Umur, Orang Mati Makai Tubai, Orang Mati Labuh, Mati Tesat, Mati Lemas, Mati Pangka Peti, Mati Telih enggau mayuh bengkah pemati.

Angkat ari nya, sida mansa mayuh bengkah menua bunsu burung, bunsu antu, bunsu jelu nyengkaum menua Bunsu Belut ke beberita muka Pintu Tanah. Nyadi lebuh Sebayan ke nuntung ba Pintu Tanah, dia lemambang lalu ngeluluka Dara Rambai Geruda meransang orang ke lelaki muka Pintu Tanah.

Tang siku pan nadai meh berani muka. Nya alai dia baru Bunsu Belut muka Pintu Tanah munyi ke udah disebut tadi. Udah nya baru bala Sebayan ngalih ba menua kitai idup tu baka menua Mengalai Ulun Tuai Indai Bilai, menua Burung Belangking enggau menua Bubut. Bala Sebayan lalu mansa temuda ke alai sida bayam bunga tanam dia.

Angkat ari nya sida lalu datai ba tembawai, sereta pendai orang ke begawai. Ditu orang ke ninga kelulu lemambang tau labuh ai mata laban semengat orang ke udah parai nya ingat ka ulah iya agi idup, lebih agi rambau iya agi biak menya, bentancharka batu kinyang ba pendai, betundi enggau sida ke indu, bebuti sama bujang enggau dara. Nya alai utai tu tau ngasuh kitai sinu ati ninga, lebuh orang parai nya mulaika pengingat iya.

Udah nya baru bala Sebayan nuntung ba madang Ranyai. Ditu bala indu Sebayan lalu ngila ka pemanah madang ranyai. Sida ke berani lalu ngupas dan ranyai, lalu dientudika pengawa alai bala orang ke berani nyelai ranyai. Udah nya baru bala Sebayan niki rumah orang ke begawai.

Lemambang nimang jalung semalam-malam ngagai maya ai jalung dituntung ka irup orang ke ngirup jalung. Udah nya baru sida ngelulu Sebayan pulai baru ngagai menua Batang Mandai: Lalu ketawa nerekan meh Ini Inan, Gaga pulai nandai ngabang, Ari gelenggang Batang Kedap kanan, Gaga nyaan rugan papan, Bedaan ka tandan tebu tengang, Tak lalu sentai langgai meh Indai Bilai, gaga pulai ngabang, ari Batang Kedap nyulai, Naban ka salai kerungan batang…. Lemambang pan lalu nyebut leka timang kena sida mulaika semengat sida empu.