Nyabur



Mayuh endar penyaru ba orang ke biak enti duku Ilang tauka Nyabur disebut.

Antara bida ke besai tau dibanding ka kitai entara ilang enggau nyabur, ilang mata ia juring sereta pandak agi. Nyabur mata ia chundur, sema ke jako baka mata pedang samurai jipun, ia panjai sereta ribat agi ditangkin.

Ditu aku deka nusoi enggau ngelansa pasal duku Nyabur dulu. Duku Nyabur bisi dua
bansa, siti dikumbai Nyabur Pesaka lalu siti Nyabur dikena ngayau. Nyadi
duku Nyabur pesaka tu digaga lalu diyas enggau naka pemanah. Iya semina
ditangkin lebuh mindah nemuai ngabang enggau maya bisi pengerami ke bukai. Kelimpah ari nya iya endang disimpan, dikait ba tiang tengah bilik, ba dinding tempuan dalam bilik semak pintu enggau ba dinding semak pintu bilik dapur beserimbai enggau
terabai, nyadi ke penabat enti bisi munsuh temu datai nyerang, iya senang sereta
jampat dijapai.

Duku Nyabur dikena ngayau, gamal iya rumpas sereta nadai diyas. Laban enti iya diyas, iya ribat dibai. Kelimpah dikena ngayau iya mega ditangkin mindah kiba-kanan, nurun mansai, kumai, ngembuah, mandi enggau semua pengawa ditanah. Tang iya UKAI dikena gawa, semina dikena nyendia nyaga diri enti munsuh nyerang.

Arapka saritu bala kitai ke agi biak enda kelalu balat lelang ati limpang penemu ngumbai duku pesaka nya dikena ngayau. Duku Nyabur ba gambar ditu nya duku pesaka, ulu iya digaga ari urat kayu langir lalu dikawit ngena seraput upih aping. Utai dikumbai butuh kunding nya udah patah laban besi betegar.

Pia mega ngepan ke dikena orang nurun ngayau laban sekeda cherita ke ditulis orang selamatu ngepan dikena ngayau nyau baka ngepan kena nurun ngabang. Nganti udah bisi kenang ari aya Rintai Edmond ke dudi ari ila, pengudah ia nusoi ke bida ngepan bansa kitai nurun ngayau sereta nurun ngabang, aku deka ngelakar ia ba kertas, ngambi ke terang agi dipeda bala pembaca.

Penudi sekali, aku meri besai terima kasih ngagai aya Rintai Edmond laban enti nadai tegal penemu ka dikunsi ke ia, nadai gak utai ke ditusoi sereta disara kitai baka ke kali tu.

Kitai Iban sigi patut bekunsika buah penemu ti manah enggau pangan diri, baka ke beduaka lampang rusa, bebagika lampang babi, ngenjuk lampang pelanduk, betetakka lampang bayak. Ngambika utai ti berat tau nyadi lempung, utai simpi tau segala, utai bingkuk tau lurus. Bekunsi kitai buah penemu ti manah enggau pangan diri ngambi ke bansa kitai tau pegari ditemu dunya, bediri sama tinggi, duduk sama pemaruh enggau bansa bukai. - Nadai salah mejah seruri, sigi endang dianti-anti. :)

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s