Utai ke dipilih nuan saritu, nentu ke pejalai nuan ila.


Endang sigi gaya ripih pengawa bala kitai ninting taun, baka ke beumai, udah nunu, lalu betambak/nugal, padi mansau kitai ngetau. Pia mega enggau pengawa bala sida ke sekula, baka bala kitai kelia maia ke agi sekula suba mega, udah pemutus peresa SPM tauka STPM pansut, sigi bekedebus meh bala keulu-keili begiga ke jalai kena ngemansang ke langkah diri.

Jalai sigi semampai bisi ba depan mata kitai, utai ke ditanya, jalai ni ka dititih kitai; utai ke dikeirau, betul ke enda jalai nya?

Minggu ke udah aku bisi betemu enggau aya aku Cikgu Menjang, dia kami duai lalu ngirup. Udah ke bekenang ke pemutus peresa bala kaban belayan sereta nanya ke pemutus peresa menyadi aku dia ia lalu madah ke bisi sida ari rumah panjai alih Melugu bisi datai ngagai opis ia sereta betanya ke bakani ke gaya ka mutar ke anak ia ti alang-alang pemutus peresa, ka dikumbai enda manah, manah gak nya; dikumbai jai, enda gak.

Nitih sereta beteladan ke pemutus peresa anembiak tu tadi, kira ke ulih tauka “layak” ia tu masuk ngagai Politeknik, ambis nadai tau nguji ko kitai. Tang alit ati, orang ke datai ka ninga ke penemu tu tadi nyau nemu agi gak mantai ke penemu diri.

“MASTERSKILL” manah ko ia. Senang ngiga pengawa enti masuk belajar nyadi misi ba dia. Duit ulih gak minjau dia (PTPTN). Nya alai, lalu puntan dia meh laban orang ke ngempu anak udah madah ke ni jalai ke ngena.

Nyadi aku saritu ka bekunsi enggau bala ke bukai entang pemesai reti “Utai ke dipilih kitai saritu, nentu ke pekalai kitai ila”.

Dunya kemaia tu nadai sigi utai ke garenti. Dua tiga degree dikemisi bedau tentu nuan tau bulih pengawa enti utai ke diambi nuan maia ke belajar ba Universiti nya tadi ukai kursus ke “specific” tauka kursus ke dipinta market pengawa baka ke saritu. Baka ke diatu, 2 kursus pelajar ke sigi garenti kerja udah ke abis belajar nya tadi kursus dalam bidang “Perubatan” enggau “Perguruan”.

Garenti tu enda mesti, garenti tu “Bersyarat”.

Laban umpan “Guarenteed Job” tu, bala sekeda lepa lalu tama dalam bubu.

Ngambi ke banding, enti nuan ka nyadi misi. Ngambi ari jalai ke ngena. Abis SPM, minya Staff Nurse tauka Jururawar Masyarakat ba Kementerian Kesihatan Malaysia.

Nama kebuah pia? Nama kebuah enda ari Kolej swasta ke bisi meri kursus “Nursing”? Enda manah pia?

Kebuah ia laban.

1. KKM bisi “recruit” misi ke badu lalu kereja terus enggau perintah. Kuota misi ari KKM graduat ninting taun chukup mayuh, kira ke chukup kena ngisi pengurang ba sepital.

2. Enti agi bisi ke kosong, sida ia dulu merening IPTA (UiTM, Unimas etc) ke bisi meri kursus “Nursing”. Kebuah ia, IPTA sigi didulu ke urang ari IPTS.

3. Enti agi bisi laluh ke kusong, baru orang merening nuan. Tang, sebedau nuan diambi orang bekereja, dia nuan mesti interview dulu, enda baka orang ke bukai laban baka ke udah dipeda, ba sepital, sida misi ke sama “practice”, sida misi ke belajar ba KKM jauh manah ari misi ke belajar ba IPTS-IPTS.

Bah, dini alai nuan ka kereja? Ba Hospital Swasta? Kuching Specialist (KPJ co Group) bisi recruit misi sida empu. Normah bisi recruit misi sida empu. Nama penyadi? Duit udah mayuh kena belajar. Utang pan mayuh melit punggung enti nuan ngambi PTPTN.

Berunding dua tiga kali sebedau mutus ke diri ka nitih jalai ke sigi ni. Enti enda gak ulih terunding kediri, tanya bala ke udah dulu ngerembang menua, tanya sida ke nemu, tanya bala cikgu, tanya sapa-sapa ke ka ditanya nuan. Ari nya tadi nuan manding ke utai ke dipadah siko-siko. Udah nya baru nuan ngaga pemutus diri.

Kitai Iban sigi patut bekunsika buah penemu ti manah enggau pangan diri, baka ke beduaka lampang rusa, bebagika lampang babi, ngenjuk lampang pelanduk, betetakka lampang bayak. Ngambika utai ti berat tau nyadi lempung, utai simpi tau segala, utai bingkuk tau lurus. Bekunsi kitai buah penemu ti manah enggau pangan diri ngambi ke bansa kitai tau pegari ditemu dunya, bediri sama tinggi, duduk sama pemaruh enggau bansa bukai. - Nadai salah mejah seruri, sigi endang dianti-anti. :)

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s