Reti Pengerindu


Seleka jako PENGERINDU(LOVE), endang udah nyadi ka buah jako semoa mensia. Baik indu baik laki, ari nembiak mit datai ke mentis ti tuai, sigi nemu bejako sereta bekenang ka jako Pengerindu.

Taja pia, nemu ke enda kitai reti jako pengerindu tu? Kala ke enda kitai nyangam penalam reti jako nya?

St Paul ngena jako pengerindu nya kena ngajai orang kristian di korint maia nya kelia laban taja sida udah nerima Kristus dalam pengidup sida, pengarap sida agi mekang. Sida balat endar beserengkang penemu; bebantah sereta besalah ke pangan diri. Sida belaya lalu bedengki. St Paul laban ia ti ngepun ke Eklisia Allah Taala di menua nya tusah bendar ati. Ko penemu Paul, sida patut nyadi ka teladan sereta chunto ka orang ti bedau nemu Tuhan.

Tu kebuah Paul ngekang amai bejako (1 Korint 13 ayat 1 ngagai 3) “Nyema aku ulih bejako ngena mayoh jako mensia enggau jako melikat, tang enti aku nadai pengerindu, jako aku nadai reti baka pengingar munyi gong tauka munyi luching ti sering-sering. Nyema jako aku bisi pemeri kena nusoi pesan Allah Taala, bisi semoa pengarap ti tau dikena nginsit ke bukit, tang enti aku nadai ngembuan pengerindu, aku nadai reti. Nyema aku meri samoa utai ti di kemisi aku ngagai orang seranta, datai ke ngasoh tuboh diri di tunu, tang enti aku nadai pengerindu, utai nya enda pulai ke pemanah aku.”

Nyadi nama reti pengerindu ke bendar? Pengerindu nya pengeliat enggau penelap, ia ukai utai ti kepapas, tauka temegah, tauka sumbong. Pengerindu ukai perangai ti jai, tauka rangka, tauka jampat ringat. Pengerindu enda ngitong penyai, pengerindu ukai gaga ke utai ti jai, tang ia gaga ke utai ti bendar. Pengerindu nya tan dalam samoa utai ti nyadi, arap ke samoa utai, ngadang semoa utai, liat ati sereta mujur ngereja utai. Pengerindu nya meruan belama-lama.

Bisi quote ribai ti diambi ari 1 Korint ayat 13 ti nyebut “faith, hope, love, abide these three; but the greatest of these is love”. Reti ia, Pengarap, Pengadang enggau Pengerindu, lalu ia ti pemadu besai nya Pengerindu.

Semoa ulah sereta utai ti dikereja mensia sigi enda ulih lari ari utai ke udah diripih ke aku ba atas tu tadi. Nadai pengerindu, utai ti dikereja enda tau pulai ke pemujur.

Ngambi ke banding dalam pengawa kitai ke besekula, enti bisi pengadang, bisi mega pengarap ke diri nya tau nyadi mensia, tang pengerindu ke besekula, pengerindu ke ka belajar nya nadai, nadai meh guna ia.

Bai dalam pengawa ti idup melaki bini, pengerindu nya lumbur 1.

Dalam pengawa kitai ke deka ngetan ke main asa sereta adat kitai iban. Pengerindu nya mesti bisi, baru kitai ulih bejalai ke pengawa ke udah nya.

Dalam pengawa kitai ke begulai bebakih enggau orang bukai, bai nya sama bansa, tauka enda, sama pengarap tauka enda. Pengerindu ke begulai nya mesti bisi, baru kitai ulih begulai nyamai, udah nya tadi baru kitai ulih sama bela bebasa ke bala pangan. Nama kebuah? Ketegal pengerindu kitai ke begulai.

Pengerindu kitai ngagai menua kitai nadai kurang gak pemesai ia. Ari pengerindu kitai ka menua ke dalam, nya baru kitai ulih tepeda sereta nemu diri ka chukup betuah laban ke doaada nyadi mensia ba menua ti dikumbai kitai Malaysia.

Sama-sama kitai nyaga pengelikun menua, sam-sama kitai bepegai sereta idup ngena cara kristian ke bendar. Enti orang nampar mua sepiak kanan kitai, asur ke mua sepiak kiba.

Tuhan merekat ke Malaysia.

Jako tundi: Rindu ke munsuh kita, kelengah ia nemu sida leju laban makin sida begedi, makin kita rindu. – Love your enemy, they’ll piss off.

Kitai Iban sigi patut bekunsika buah penemu ti manah enggau pangan diri, baka ke beduaka lampang rusa, bebagika lampang babi, ngenjuk lampang pelanduk, betetakka lampang bayak. Ngambika utai ti berat tau nyadi lempung, utai simpi tau segala, utai bingkuk tau lurus. Bekunsi kitai buah penemu ti manah enggau pangan diri ngambi ke bansa kitai tau pegari ditemu dunya, bediri sama tinggi, duduk sama pemaruh enggau bansa bukai. - Nadai salah mejah seruri, sigi endang dianti-anti. :)

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s