Kapit datai Jalai



Pengudah ke nganti 46 taun pengelama udah Sarawak masuk Malaysia. Orang Kapit diatu tau tuchum kediri, laban malam kemari, 2 aribulan 10 taun 2009, Datuk Sri Dr James Jemut Masing madah ke kitai, Kapit deka datai jalai enda lama agi.

Jalai ke nyambung ke Kapit ngagai menua bukai dalam Sarawak tu bepun ari Kanowit ngagai Ngemah, ari Ngemah ngagai Song, lalu ari Song ngagai Kapit. Jalai tu dijangka ke tau tembu maia taun 2013 tu ila.

Orang Kapit diatu tau berengkah tuchum lantang, munyi ko sekeda, nya baru enda lebu ngundi BN ngelama tu. Nya baru enda lebu kitai masuk Malaysia, kelebih agi salah siku orang ke besangkut-paut dalam “Penubuhan Malaysia” 46 taun ke udah datai ari kapit, kitai iban ti chukup tebilang nama, Tun Datuk Patinggi Temenggong Jugah. Enti nitih ke ia, enda ibuh ngelama nya alai Kapit datai jalai, enti perintah ka jempat malas jasa Tun ke udah nyukong Sarawak tama Malaysia, enggau semua utai ke dikemisi ke Sarawak ti kaya ari semua utai, alai Semenanjung ke saritu tau maju baka ke diatu.

Taja pia, orang Kapit patut beterima kasih ngagai bala YB sida ke enda nemu leju bediri ngari ke rakyat, enda nemu malu, ngasur ke diri ngagai Kerajaan Persekutuan, minta projek jalai tu tadi, sekali enda ulih, dua, tiga, kelengah-lengah ke nganjung mua enda nemu malu, diatu Kerajaan Persekutuan udah setuju, ngagai jalai ke rakyat Malaysia ke diau ba Kapit. Taja pan lama, tang bisi gak asil.

Nyadi, ari “pengumuman” Kapit deka datai jalai taun 2013 tu ila, BN Kapit bisi bulih “credit” kena napi Pilihanraya DUN ke dijangka enda entu lama agi. Kebuah pia, enti perintah enda “ngagai jam”, penusah Kapit ke enda datai jalai tu tau nyadi ke “bahan politik” sida Parti Penyakal.

Ari tu tadi, sida Parti Penyakal udah lenyau sigi “point” ke manah kena sida bekempen ngelaban BN. Tang sigi “point” tu tadi enda ngejung ke sida nadai jalai agi kena “memancing undi” laban sigi “point” ba Kapit udah puntan, beribu “point” ke bukai agi mengkang ayan.

Ngambi ke banding, kes Marina ke enda ulih masuk matrix laban ke dikumbai orang ukai Bumiputera tu tadi tau nyadi ke “bahan politik” ti chukup kering kena Parti Penyakal ngelaban pengelemi BN. Article 161 A ke berat sepiak sereta ngelaung ke hak kitai bansa, system subsidi minyak taun 2010, karan enggau ai, jalai ngagai menua pesisir ke bukai dalam menua Sarawak, sepital, sekula, semua tu ila tau nyadi isu magang maia ke bekempen.

BN mesti bekerja bebendar ke agi enti sida agi ngarap ke undi ari rakyat Sarawak laban diatu dunya udah maju, rakyat udah makin pandai, ya ke enda pandai nya tadi engka mayuh gak nyau leju enggau janji ke ditabur tang apin gak peda penatai.

Baka ke diatu, enti perintah BN Sarawak ulih ngering ke diri ngambi ke Article 161 ti beciping ngagai Bumiputera Sarawak nya diubah, aku pecaya “keyakinan” rakyat Sarawak ngagai perintah BN tau nambah belipat ganda ari ke diatu, laban, sapa ke enggai ke perintah ke siru ke rakyat? Sapa ke enggai ke perintah ti amat bediri ngari ke rakyat?

Rakyat enggai ke YB ti bula, YB ti empelita, YB ti bejaku tinggi, YB ti semina ngisi periuk asi diri. Ya ke diatu dipeda aku, mayuh YB ke bakanya dalam BN. Enti sida enda berubah, enti YB ke bakanya agi mengkang,ka pedis-pedis BN menang majority pilihanraya DUN tu ila.

Kitai Iban sigi patut bekunsika buah penemu ti manah enggau pangan diri, baka ke beduaka lampang rusa, bebagika lampang babi, ngenjuk lampang pelanduk, betetakka lampang bayak. Ngambika utai ti berat tau nyadi lempung, utai simpi tau segala, utai bingkuk tau lurus. Bekunsi kitai buah penemu ti manah enggau pangan diri ngambi ke bansa kitai tau pegari ditemu dunya, bediri sama tinggi, duduk sama pemaruh enggau bansa bukai. - Nadai salah mejah seruri, sigi endang dianti-anti. :)

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s