Kayau Baru Ngena Penemu



Enti dulu kelia pama sida bantin, nyumbang, pelima mujah, rentap enggau ke bukai matak bala nurun ngayau.Nadai kala pulai lebu bala sida… pia mega legend kitai iba(sida keling,laja,sempurai,bungai nuing..)

Tang ke diatu sapa tau dikumbai kitai Tuai Kayau Rebak Baru?

Tu meh utai ke ngelubah ke kitai dayak/iban lubah amat mansang. Laban kitai nadai tuai ke teguh, tuai ke ulih ngiring bansa, tuai ke ulih ngelua ke runding kitai ngagai tuai pemegai menua malaysia.

Ke diatu tuai kita tau dikumbai kitai tuai cap pala agung, tuai ti datai maya kimpin aja tauka tuai natuk ka pala. Seagi kitai dayak/iban nadai Tuai Kayau ke tau kayau, munas ke penyeranta kitai dayak/iban…seagi nya meh kitai nyadi anak kampar ba menua diri.

Taja pia, beribu iku tuai kayau baru enti sama bela berebut ka megai ulu duku, raban pengayau nyau bejuta tang enda nemu ngena senjata. Nadai meh penuju, nadai meh guna.

Nya alai kitai mesti nyikap diri enggau penemu, udah nya kitai nurun ngayau baru!

Ditu aku magi penemu aku senentang pelajar kitai Dayak. Pelajar ke dikenang aku tu lagi besangkut -paut enggau pelajar sekula ti ulih ari Kolej enggau Universiti. Berengkah ari kelia, kelebih agi diatu, pelajar nya meh senyata ti pemadu manah dikembuan. Ba aku siko, pelajar nya meh jalai ti pemadu manah kena bansa kitai niki. Tauka, semina jalai kena kitai bansa angkat (The only way up for the Dayak people). Pasal bedagang, udah dikuasa bansa china. Pengawa politik, udah digengam bansa Melayu. Bah, nama ke ditinggal ke bansa kitai deh enti enda pelajar? Pelajar tau nukar pengidup kitai ari semua segi. Runding, ulah, pengeraja, pengelantang, penyenang enggau pengerai. Enti udah keluar universiti, pengidup endang tau disadang senang. Munyi ko jako tuai, kurus-kurus pen baya, enda meh nyadi bayak.

Ngena pelajar ke chukup, kitai ulih sama-sama enggau bansa bukai maju, ba politik tauka dagang. Tang meh sinu ngenang, pelajar sekula tu ukai utai ti selalu dikerindu dipetati dikerunding ke bansa kitai. Randau sida selalu richah enti bejako pasal politik, ngirup, nyabong, ngasu, bumai enggau bejalai. Enti sida berandau pasal sekula, sida bejako ke pasal rumah sekula, pemakai ba sekula, pengerami sekula enggau pengajar sekula. Tang jarang berandau ke pemansang anak sida ba sekula.

Anang bala kitai malu ke peturun diri empu, kita patut temegah ke diri ti peturun bujang berani. Anang mega bala kita saru penemu, laban kayau ke disebut aku ukai bebunuh baka kitai iban kelia menya.

Kitai mesti mulai ke pengingat lama ngenang aki kitai kelia ke bebendar munuh munsuh maia ke ngayau. Saritu, kitai ke rebak baru anang alah laban bansa bukai, laban kelia kitai udah menang, diatu kitai mesti ka menang mega. Kitai mesti bebendar ngayau penemu, ngayau pemandai, ngayau kerja ngayau pengaya, ngambi ke kitai bansa ulih nerus ke gelar bujang berani. Ukai berani babi, tang berani ngiga penemu, berani ngereja pengawa, berani nguji utai ke baru (beperang anang takut mati, bedagang anang takut rugi.) pia mega berani ngereja utai ti tau mai pemansang serta penyenang ke kitai bansa. Kelebih agi kitai ke ngasu pelajar, nadai jalai bukai agi diatu, pelajar aja jalai kitai ulih ngubah pendiau bansa kitai.

Aram meh kitai bebagi ke penemu pasal sekula. Nyangka bisi sekeda sida ke ngumbai kitai tu kerah-kerah ngapa, mulut nyebut patong enda nyaut. Tang anang bangat beguai ngerunding utai kia. Dalam semua utai dikereja, kitai mesti bejako berandau dulo sebedau berengkah. Nadai guna agi kitai bejako enti utai udah tembo. Maia tu meh ke dikumbai beransah ke penemu. Kena kitai nyikap diri.

Besedia. Enti kelia, kitai bansa sanggop begadai ke nyawa napi peluru leka senapang, enda mudah undor ngapa, enda mudah ngako alah, diatu nadai kebuah ga kitai enda ngeransing nya ngulih ke degree. Maia nya suba, berambai urang ke jako kitai, “agi idup agi ngelaban”. Tang diatu nadai agi munsoh, nya alai aku arap ke bansa kitai, mit-besai, biak-tuai, ngereja pengawa sekula enggau naka ulih. Anang ngetu taja pen asai ke enda alah. Jamah kekura, anang ngetu ngapa semadi meh udah tepangka ba bandir tang diatu aku mai kitai besaup ningkoh bandir nya ngambi ke kitai ulih nerus ke pejalai nuju pelajar.

Enti Islam agik bedau ngena istilah “Jihad” sampai ke saritu. Nama kebuah kitai iban enda ngena istilah “Kayau” kitai?

Suba kitai bansa ngayau ngena ilang ngena duku, saritu kitai ngayau ngena pemandai ngena penemu!!

Naka tu dulu penemu ari aku. Ukai reti nya nyau ambis. Tu baru berengkah. Meri peluang ngagai bala pemacha ga mansut ke penemu sida. Penemu ari kita bukai pen nadai meh nya kurang ari enggi aku.

Kitai Iban sigi patut bekunsika buah penemu ti manah enggau pangan diri, baka ke beduaka lampang rusa, bebagika lampang babi, ngenjuk lampang pelanduk, betetakka lampang bayak. Ngambika utai ti berat tau nyadi lempung, utai simpi tau segala, utai bingkuk tau lurus. Bekunsi kitai buah penemu ti manah enggau pangan diri ngambi ke bansa kitai tau pegari ditemu dunya, bediri sama tinggi, duduk sama pemaruh enggau bansa bukai. - Nadai salah mejah seruri, sigi endang dianti-anti. :)

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s