Kitai Dayak.



1. Nangka ka diatu nadai tuai Dayak ka amat amat ngering ka Dayak

Nyangka apin/bedau ada ka dunya tu meh nya kini. Kitai ka bejurai tu semampai rengik rengik minta petara malik ka moa, ngica ka IBAN/Dayak badu sebana lalu kering kaya raja baka laut enggau cina.

Semoa utai ka disebut nuan nya Unggal endang ia ke bendar, kemaya kitai kala ninga Tuai Iban/Dayak bisi langgur tau ka perambu deka ngaga Iban/Dayak nyadi Millionaire munyi bala Tuai laut??

Indah vision “siko sepintu graduate” suba pan bepun ari penemu enggau jurai ke baka enggi kitai tu. Enti bepun ari mulut sida endang sigi nadai kala ninga, nadai kala maca.

2. Party amat mayuh meh dimenoa Sarawak tu

Semoa nya party bangsa dayak magang. Kati ko enda pia, uji enti Jabu bejako, PBB-Pesaka party Dayak ko ia, enti Mawan bejako, SPDP party Dayak meh ko ia lban betuai ka Dayak, lalu baka nya mega enti Masing bejako, PRS lebih agi laban ko ia party tu nyambung seput PBDS ka udah parai suba.

Supp?? pan sama party Dayak. Ni enda pia, laban ko bala cina enti nadai bala Dayak sida tetap enda olih bediri ba sitak ka mayuh di wan bangsa Dayak, nyin peda di Simanggang, di kah menoa IBAN, ba asal puak menoa IBAN, party ni empu penuduk, SUPP.

3. Orang sigi enda sekali kali ngasoh kitai tu segempong, segulai, sepenemu, serunding

Nya meh, kebendar orang sigi enda sekali kali ngasoh kitai tu segempong, segulai, sepenemu, serunding, sejako…bla…bla…laban orang nemu tubuh kitai tu mayuh tang ko sida kitai enda nemu nyadi ka TUAI KEPALA MEGAI PERINTAH ENGGAU MENOA.

Mayuh bangsa kitai udah pandai diatu, ukai agi siko sepintu graduate, tang bisi sampai 2-5 iko sepintu graduate, tang meh enda rauh rauh madah ka orang. Nama kebuah kitai enda temu orang pandai, tampak rita pintar berunding enggau bekira? laban idup kitai ari mit semampai dipicit, di enyak ka bangsa orang belama. Mimit ka nyulur, papar orang ga.

Bangsa kitai empu ka diatas din pan enda ga ngulur ka jari narit kitai ka atas agi, nama kebuah? laban sida takut ka periok diri empu pecah, penuduk enggau pangkat diri empu tebererak.

4. Kitai enggai enda pan mesti bisi PERAU enggau RUMAH kediri.

Nya alai, baka ni kitai ka sama bela, sama rata duduk bediri enggau bangsa bukai? Enda olih, seagi agi kitai nyadi ka engkaramba orang, nyangking perau orang, nungking rumah orang. Kitai enggai enda pan mesti bisi PERAU enggau RUMAH kediri.

Enti enggi laut, perau Bidar, enggi kitai Iban perau TEMUAI lalu enggi cina perau Naga. Dini bisi sama nya, Iban nepan perau Bidar sigi ka karam laban kitai enda landik nepan perau ringgar, nepan perau Naga pan baka nya, kemaya kitai kala ngayuh ka perau baka tongkang di tasik?
Tu udah cukup nyadi ka chunto nunjuk ka kitai MESTI BISI PERAU KA DIRI ke sebaka reti enggau kitai ka MESTI BISI PARTY KA DIRI.

5. Penyakit kepapas

Enti kitai bisi perau ka diri, kitai nyamai ka segempong, seati, sejalai, kitai enda karam ngapa, laban kitai sama sama ngering ka ia. Tang siti penyakit besai bangsa kitai ka apin olih di ubat diatu, berapa iko udah bangsa kitai ngembuan pelajar DOCTOR OF MEDICINE, BEDAU meh penyakit nya olih di ubat diatu, penyakit nya dikumbai kitai PENYAKIT KEPAPAS.

6. Penutup

Ari nya, patut ngeleda meh Tuai bangsa kitai, anang takut ngering ka kitai, ambi ia ka sigi ungkup kitai. Anang ngemata ka aja enti orang micit ngenyak ka bangsa kitai. Angkat ka bangsa kitai. Enti enda baka nya, sigi enda badu meh ANAK IBAN, BANGSA DAYAK sebana nguan dunya tu.

Kitai Iban sigi patut bekunsika buah penemu ti manah enggau pangan diri, baka ke beduaka lampang rusa, bebagika lampang babi, ngenjuk lampang pelanduk, betetakka lampang bayak. Ngambika utai ti berat tau nyadi lempung, utai simpi tau segala, utai bingkuk tau lurus. Bekunsi kitai buah penemu ti manah enggau pangan diri ngambi ke bansa kitai tau pegari ditemu dunya, bediri sama tinggi, duduk sama pemaruh enggau bansa bukai. - Nadai salah mejah seruri, sigi endang dianti-anti. :)

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s